დღეს, 18 ივნისს იუსტიციის უმაღლესი საბჭოს არამოსამართლე წევრს, ნაზი ჯანეზაშვილს უფლებამოსილების ვადა ამოეწურა. მან იუსტიციის უმაღლესი საბჭოს წევრის რანგში დასკვნითი ბრიფინგი გამართა, სადაც ისაუბრა, რომ პოლიტიკაში წასვლას არ აპირებს და ამის ნაცვლად, სასამართლოს საკითხებზე მომუშავე ორგანიზაციას დააფუძნებს.

"ვიქნები ორიგინალური და არ წავალ პოლიტიკაში, მე გადავწყვიტე, რომ გავაგრძელო სასამართლო თემაზე სიღრმისეული და ფუნდამენტური მუშაობა, არ ვაპირებ, რომ ამ 4-წლიანი საქმიანობის შემდგომ დავასრულო ეს ეტაპი და შევეგუო იმ მდგომარეობას, რაც ჩვენი ქვეყნის სასამართლო სისტემაშია. მე ვაპირებ, დავაფუძნო ორგანიზაცია, რომელიც იმუშავებს მხოლოდ სასამართლო თემაზე", — თქვა მან.

იუსტიციის საბჭოში მოღვაწეობის პერიოდში ჯანეზაშვილი აქტიურად აკრიტიკებდა სასამართლო სისტემას და ე.წ. კლანის არსებობაზე საუბრობდა. ის მიუთითებდა შესაძლო ნეპოტიზმსა და დარღვევებზეც.

17 ივნისს იუსტიციის უმაღლესი საბჭო პარლამენტს უზენაესი სასამართლოს მოსამართლეობის 9 კანდიდატს წარუდგენს. აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.