ჟურნალისტური გამოძიებით მხილებული თაღლითური ქოლ-ცენტრის, A.K. GROUP-ის ხელმძღვანელებსა და აგენტებს პროკურატურამ უძრავი ქონება დაუყადაღა — ამის შესახებ სტუდია მონიტორი წერს ფეისბუქზე.

საჯარო რეესტრს ყადაღის რეგისტრაციის მოთხოვნით საქართველოს გენერალურმა პროკურატურამ დღეს, 13 მარტს მიმართა.

აი,ფაქტის ჟურნალისტურ გამოძიებაში ნათქვამია, რომ გამოძიებისას იდენტიფიცირებულ თაღლითებს, სუს-ს და პროკურატურას კითხვები გაუგზავნეს. კითხვების მიღების შემდეგ "სკამერებმა" სოციალური მედიის ანგარიშები დახურეს/წაშალეს, ხოლო კომპანიის ოფიციალური მფლობელმა, მერი შოთაძემ მის სახელზე გაფორმებული ყველა ქონება გაასხვისა.

სტუდია მონიტორის ცნობით, დაყადაღებულია:

  • აკაკი ქევხიშვილის უძრავი ქონება, კომპანიის წილი და დედის სახელზე რეგისტრირებული ქონება.
  • მერი შოთაძის კომპანიის წილი და უძრავი ქონება, რომელიც მან 25 თებერვალს გადააფორმა სხვა პირზე.
  • ლანა ვახტანგაძის სახელზე რეგისტრირებული პარკინგი თბილისში.
  • თახირ სულთანოვის სახელზე რეგისტრირებული უძრავი ქონება — მიწის ნაკვეთი მცხეთაში და ბინა თბილისში.

თაღლითური ქოლ-ცენტრის, A.K. GROUP-ის საქმიანობის გამოაშკარავება საერთაშორისო ჟურნალისტური გამოძიების ფარგლებში მოხდა. გამოძიებაზე ქართული მედიები სტუდია მონიტორი და აი, ფაქტი მუშაობდა.

თბილისის ცენტრში, საბურთალოზე მოქმედ ორ ქოლ-ცენტრში 80-ზე მეტი ადამიანი მუშაობდა. 2022 წლის მაისიდან 2025 წლის თებერვლამდე მათ 6 100-ზე მეტ უცხოელ მსხვერპლს 35 მილიონი დოლარზე მეტი გამოსძალეს.

საქართველოში მოქმედი ქოლ-ცენტრის უკან შპს A.K. Group დგას. კომპანიის ოფიციალური მფლობელი 36 წლის მერი შოთაძეა. ის მართავს უცხო ენების მცოდნე ახალგაზრდების ჯგუფს, რომელიც უცხო ქვეყნის მოქალაქეებს თაღლითურად ძარცვავს.

· აღმოჩნდა, რომ ამ პროცესს შოთაძესთან ერთად მართავს მისი ბიზნეს-პარტნიორი, 33 წლის აკაკი ქევხიშვილი.

· A.K. Group ცდილობს საჯაროდ არსად გამოჩნდეს: არც ინტერნეტში აქვთ ინფორმაცია განთავსებული და არც აბრაა გამოკრული მათ ოფისებთან. თუმცა, კომპანიის წვეულებაზე გადაღებული და შემთხვევით საჯაროდ გამოქვეყნებული ფოტოები ჟურნალისტებს ქოლ-ცენტრის თანამშრომლების ამოცნობაში დაეხმარათ.

გამოძიებაში ნათქვამია, რომ ქოლცენტრების თანამშრომლები თვითონვე ღიად უწოდებენ საკუთარ თავს "სკამერს და ტრაბახობენ მდიდრული არდადეგებით, ძვირფასი სამკაულების შეძენითა და მაღალი კლასის ტანსაცმლით.

მაგალითად, ერთ-ერთი წამყვანი სკამერი ქორწილში ვერტმფრენით ჩაფრინდა.

გამოძიების დეტალები იხილეთ სრულად:

ქოლ-ცენტრის ქართული "იმპერია" — ჟურნალისტური გამოძიება