სერბი სტუდენტები, რომლებიც უკვე რამდენიმე თვეა, ხელისუფლების ცვლილების მოთხოვნით ქვეყნის სხვადასხვა ქალაქში საპროტესტო აქციებს მართავენ, ნობელის მშვიდობის პრემიაზე წარადგინეს. ინფორმაციას სერბი მწერალი, სინისა კოვაჩევიჩი ავრცელებს.

"ნობელის კომიტეტიდან დასტური მივიღეთ, რომ ჩემი და ადვოკატი დიჟანა სტოიკოვიჩის მიერ გაგზავნილი ნომინაცია სერბი სტუდენტების ნობელის მშვიდობის პრემიისთვის მიღებულია. ისინი ამას იმსახურებენ," — წერს მწერალი სოციალურ ქსელ X-ზე.

პრეზიდენტ ალექსანდრ ვუჩიჩისა და სერბეთის პროგრესული პარტიის (SNS) მმართველობის საპირისპირო აქციები ბელგრადსა და სერბეთის სხვა დიდ ქალაქებში დეკემბრიდან ტარდება, მას შემდეგ, რაც ქალაქ ნოვი-სადში რკინიგზის სადგური ჩამოინგრა, რამაც 15 ადამიანის სიცოცხლე იმსხვერპლა.

ფოტო: Sarajevo Times

აქციების ყველაზე მნიშვნელოვანი მომენტი იყო სერბი სტუდენტების მსვლელობა ბელგრადიდან ნოვი-სადამდე. გზაში სტუდენტებმა ღამე კარვებში გაათენეს, მაგისტრალი გადაკეტეს და რამდენიმე ხიდის ბლოკადაც მოახდინეს.