NATO-ს გენერალურ მდივან მარკ რუტესთან თეთრი სახლის ოვალურ კაბინეტში გამართულ შეხვედრაზე, ჟურნალისტმა აშშ-ის პრეზიდენტ დონალდ ტრამპს დაუსვა კითხვა იმის შესახებ, თუ რა არის მისი ხედვები გრენლანდიის პოტენციურ ანექსიაზე.

"ვფიქრობ, ეს მოხდება. აქამდე ბევრი ამაზე არ მიფიქრია, მაგრამ ახლა ვზივარ ადამიანთან [მარკ რუტესთან]... იცი, მარკ, ეს გვჭირდება საერთაშორისო უსაფრთხოებისთვის, არა მხოლოდ უსაფრთხოებისთვის…

რეალურად გვჭირდება გრენლანდია ეროვნული უსაფრთხოებისთვის, ეს ძალიან მნიშვნელოვანია. თუ იცით, რამდენიმე ბაზა უკვე გვაქვს გრენლანდიაზე და გარკვეული რაოდენობის ჯარისკაცები გვყავს", — განაცხადა ტრამპმა.

ჯერჯერობით, ამ განცხადებაზე ოფიციალურ კოპენჰაგენსა და ნუუკს პასუხი არ გაუციათ — წარსულში როგორც გრენლანდიამ, ისე დანიამ, მკაცრად გააკრიტიკეს ტრამპი მსგავსი რიტორიკისთვის.

მარკ რუტეს, ამ საკითხთან დაკავშირებით კომენტარი არ გაუკეთებია და განაცხადა, რომ მას არ სურს ამ საკითხში NATO-ს ჩათრევა.