ფინეთმა ოფიციალურად გამოაცხადა უკრაინისათვის სამხედრო დახმარების 28-ე პაკეტი, რომლის ღირებულებაც, დაახლოებით, 200 მილიონი ევროა.

ფინეთის თავდაცვის მინისტრ ანტი ჰაკანენის განცხადებით, პაკეტში შედის საარტილერიო ჭურვებიც, რომელიც უკრაინას სასწრაფოდ სჭირდება.

"არსებობს ფართო პოლიტიკური და ეროვნული ერთიანობა უკრაინისათვის დახმარების გაწევის აუცილებლობის საკითხზე", — განაცხადა ჰაკანენმა.

უკრაინის თავდაცვის მინისტრმა რუსტამ უმეროვმა ფინელ კოლეგასთან შეხვედრაზე ხელი მოაწერა მემორანდუმს, რომელიც ორ ქვეყანას შორის თავდაცვის კოოპერაციას ეხება. შეთანხმება ფარავს თავდაცვითი მასალებით, სადაზვერვო ინფორმაციით, კვლევებითა და ინოვაციებით ერთმანეთის დახმარებას.

რუსეთის სრულმასშტაბიანი აგრესიის დაწყებიდან, ფინეთმა უკრაინას ჯამში 2.5 მილიარდი ევროს სამხედრო დახმარება გაუწია.