მოდის იტალიურმა სახლმა, Versace-მ, დღეს შოკისმომგვრელი სიახლე გაავრცელა — დონატელა ვერსაჩე, ლეგენდარული დიზაინერი, რომელიც კომპანიის შემოქმედებითი ხელმძღვანელის პოზიციას 28 წლის განმავლობაში იკავებდა, პოსტს ტოვებს. ბრენდის ამბასადორის როლს ის კვლავ შეასრულებს, თუმცა დიზაინთან დაკავშირებული ვალდებულებები მას აღარ დაეკისრება. Versace-ს ინფორმაციით, დონატელა ვერსაჩეს დარიო ვიტალი, Miu Miu-ს ყოფილი დიზაინის ხელმძღვანელი ჩაანაცვლებს.

"ახალი თაობის დიზაინერების ხელშეწყობა ჩემთვის ყოველთვის მნიშვნელოვანი იყო. ძალიან მიხარია, რომ დარიო ვიტალი შემოგვიერთდება და ერთი სული მაქვს, Versace ახალი პერსპექტივით დავინახო," — თქვა ვერსაჩემ დღევანდელ განცხადებაში — "მინდა, მადლობა გადავუხადო ჩემს შეუდარებელ დიზაინის გუნდს და Versace-ს ყველა თანამშრომელს, ვისთან მუშაობის პრივილეგიაც სამ ათწლეულზე დიდი ხნის განმავლობაში მერგო."

განცხადებაში დიზაინერი თავის გარდაცვლილ ძმაზე, Versace-ს დამფუძნებელ ჯანი ვერსაჩეზეც საუბრობს — "ჩემი ცხოვრების უდიდესი პატივი იყო ჩემი ძმის, ჯანის მემკვიდრეობის გაგრძელება. ის ჭეშმარიტად გენიოსი იყო, თუმცა ვიმედოვნებ, მისი სულისკვეთებისა და შეუპოვრობის ნაწილი მეც მაქვს. ბრენდის მთავარი ამბასადორის პოზიციაზე Versace-ს ყველაზე გულმხურვალე მხარდამჭერად დავრჩები. Versace ჩემს დნმ-შია და მუდამ ჩემს გულში დარჩება."

ჯანი და დონატელა ვერსაჩეები

ჯანი და დონატელა ვერსაჩეები

ფოტო: Getty Images

ჯანი ვერსაჩეს მიერ 1978 წელს დაარსებული ბრენდის დიზაინის ხელმძღვანელად დონატელა ვერსაჩე ძმის ტრაგიკული მკვლელობის შემდეგ, 1997 წელს დაინიშნა. მათი უფროსი ძმა, სანტო ვერსაჩე, კომპანიის აღმასრულებელი დირექტორი გახდა, დონატელას შვილმა, ალეგრამ კი კომპანიის 50%-იანი წილი მიიღო.

ჯენიფერ ლოპესი Versace-ს კაბაში

ჯენიფერ ლოპესი Versace-ს კაბაში

ფოტო: Dazed

საკუთარი ოჯახის გვარის მატარებელი მოდის სახლში მუშაობისას დონატელამ მოდის სამყაროსთვის დაუვიწყარი დიზაინები შექმნა, მათ შორის, კაბა, რომელმაც Google Images-ის შექმნა გამოიწვია: აბრეშუმის შიფონის დახვეწილი, მოშიშვლებული კაბა ღრმა დეკოლტეთი, რომელიც ჯენიფერ ლოპესმა 2000 წლის გრემის მუსიკალურ დაჯილდოებაზე მოირგო. კაბას საკუთარი გვერდიც აქვს ვიკიპედიაზე და 2019 წელს კვლავ მოიპოვა პოპულარობა, როცა "ჯეი ლომ" ის ხელახლა ჩაიცვა Versace-ს შოუზე.