უკრაინის ომბუდსმენის დმიტრო ლუბინეცის განცხადებით, რუსულმა ძალებმა, სავარაუდოდ, ხუთი შეუიარაღებელი უკრაინელი სამხედრო ტყვე კურსკის ოლქში სიკვდილით დასაჯეს — ამის შესახებ The Kyiv Independant ავრცელებს ინფორმაციას.

მედიასთან საუბრისას ომბუდსმენმა სოციალურ მედიაში გავრცელებულ ვიდეოზე მიუთითა, რომელშიც, სავარაუდოდ, რუსი სამხედროები უიარაღო უკრაინელ ჯარისკაცებს ხოცავენ.

"ჩვენ კიდევ ერთხელ ვხედავთ რუსული არმიის მხრიდან, საერთაშორისო ჰუმანიტარული სამართლის ცინიკურ უგულებელყოფას," — განაცხადა ლუბინეცმა და დასძინა, რომ მან გაეროს და წითელი ჯვრის საერთაშორისო კომიტეტს ომის საეჭვო დანაშაულის გამოძიებისთვის წერილები გაუგზავნა.

უკრაინელი აქტივისტის სერხი სტერნენკოს თქმით, სიკვდილით დასჯის ვიდეო სავარაუდოდ კურსკის ოლქში, სოფელ კოზაჩა ლოკნიასთანაა გადაღებული.

ცნობისთვის, 12 მარტს რუსეთის პრეზიდენტი ვლადიმერ პუტინი პირველად ეწვია კურსკის ოლქს მას შემდეგ, რაც უკრაინამ 2024 წლის აგვისტოში რეგიონის ნაწილი დაიკავა.ვიზიტის დროს, პუტინმა განაცხადა, რომ რეგიონში ტყვედ ჩავარდნილ უკრაინელი სამხედროებს "მოექცეოდნენ როგორც ტერორისტებს".

გაეროს ადამიანის უფლებათა სადამკვირვებლო მისია უკრაინაში-ს ცნობით, მკვეთრად გაიზარდა უკრაინელი სამხედრო ტყვეების სიკვდილით დასჯა — 2024 წლის აგვისტოდან მოყოლებული რუსმა სამხედროებმა 24 ცალკეულ ინციდენტში 79 პირი გასამართლების გარეშე მოკლეს.