13 მარტს საფრანგეთის ეროვნულმა ასამბლეამ 288 ხმით მხარი დაუჭირა უკრაინის მხარდამჭერ რეზოლუციას, რომელშიც საქართველოს საპარლამენტო არჩევნებში რუსეთის ჩარევაა ნახსენები.

"[ეროვნული ასამბლეა] გმობს რუსეთის ჩარევას ევროკავშირისა და მისი სამეზობლოს დემოკრატიულ პროცესებში, განსაკუთრებით მოლდოვას, საქართველოსა და რუმინეთის არჩევნებში," — ვკითხულობთ რეზოლუციის ტექსტში.

რეზოლუციის ცენტრალური თემა უკრაინისთვის რუსული გაყინული აქტივებით დახმარება იყო. დოკუმენტი მხარს უჭერს საფრანგეთის როლს უკრაინელი სამხედროების წვრთნაში და ევროკავშირსა და NATO-ს მოუწოდებს, რომ გაზარდონ კიევისადმი მხარდაჭერა როგორც სამხედრო-პოლიტიკური, ისე ეკონომიკური კუთხით.

ულტრამემარჯვენე მარინ ლე პენის პარტიის დეპუტატს რეზოლუციის ტექსტიდან მოლდოვის, საქართველოსა და რუმინეთის ამოღების შესწორება ჰქონდა წარდგენილი, თუმცა მის წინადადებას საფრანგეთის ეროვნულმა ასამბლეამ მხარი არ დაუჭირა.