სახლში ყოფნა და ეკრანის ცქერა მოგბეზრდა. სადმე წასვლა და განტვირთვა გინდა, მაგრამ საფულეში მხოლოდ 10 ლარი გიდევს. რას იზამ? ალბათ, სახლში დარჩენას გადაწყვეტ, რადგან თბილისში მარტო თუ მეგობრებთან ერთად გართობა შენთვის უმეტესად ფინანსურ ხარჯებთან ასოცირდება.

სინამდვილეში, დროის სასიამოვნოდ გატარება 10 ლარადაც შესაძლებელია, როცა კარგი განწყობა გაქვს და შესაბამის ინფორმაციასაც ფლობ. შენს დასახმარებლად საინტერესო ადგილებსა და იდეებს ამ სტატიაში მოვუყარე თავი, რომელიც, ვფიქრობთ, მშვენიერ განწყობაზეც დაგაყენებს, თუ ასეთის შექმნა დამოუკიდებლად ვერ მოახერხე.

აქვე იმასაც შეგახსენებ, რომ შეზღუდული ფინანსური რესურსების გამო მანქანასა და ტაქსიზე უარის თქმა მოგიწევს და ფეხით სეირნობას, მეტროს, ავტობუსს ან სამარშრუტო ტაქსს უნდა დასჯერდე!

მაშ ასე, გთავაზობ 10 იდეას, რომლის განსახორციელებლადაც 10 ლარი საკმარისია:

1. სასიამოვნო პიკნიკი მზიურის პარკში

კარგ ამინდში შეგიძლია მარტო ან მეგობრებთან ერთად მზიურის პარკს ესტუმრო, ღუნღულა პლედი გაშალო და სიმწვანის სუნით დატკბე. თუ ბურთს ან ბადმინტონის ჩოგნებს წაიღებ, კარგი ვარჯიშიც გამოგივა. არც ველოსიპედითა თუ გორგოლაჭებით სეირნობაა ცუდი იდეა. თუ უბრალოდ დასვენება გინდა, შეგიძლია წიგნი წაიკითხო ან იქვე ციცქნა ტბისა და მისი უსაყვარლესი ბინადრების ცქერით გაერთო. იმ ფულით, რაც მგზავრობისთვის არ გჭირდება, ცოტაოდენი სასუსნავიც მოგივა. თუ გაგიმართლებს, შესაძლოა პარკში მუსიკის ჰანგებიც გაჟღერდეს ან გამოფენას, საინტერესო ლექციას თუ კინოჩვენებას სრულიად უფასოდ დაესწრო.

2. თბილისის ჯადოსნური ქუჩების ფეხით შემოვლა

ყოველდღიური რუტინის წყალობით, გარეთ გასვლისას ხშირად ვერც კი ვამჩნევთ იმ საოცარ ქუჩებს, სადარბაზოებსა და სხვა ჯადოსნურ დეტალებს, რომლებითაც ჩვენი დედაქალაქი ასე გულუხვად გვანებივრებს. განსაკუთრებით საინტერესო სოლოლაკში ხეტიალი და ძველებური ეზოებისა და აივნების ცქერით წარსულში მოგზაურობაა.

3. კედლის ნახატების ფონზე ფოტოების გადაღება

თუ ძველის შემდეგ თანამედროვე თბილისით ტკბობა მოგინდა, თან ინსტაგრამზეც შემოგაკლდა ფოტოები, საინტერესო კედლის ნახატების აღმოჩენა და მათ წინ პოზიორობა მშვენიერი იდეაა. საუკეთესო ადგილების წინასწარ შერჩევაში ჩვენი სტატიაც დაგეხმარება:

თბილისის კედლის ნახატები, რომლებიც აუცილებლად უნდა ნახო.

4. მშრალ ხიდზე ძველმანების დათვალიერება და სამახსოვროდ პატარა ნივთის შეძენა

თუ საინტერესო აღმოჩენების ხასიათზე ხარ, მშრალი ხიდი ნამდვილად საშენო ადგილია. თვალისმომჭრელი სამკაულების, ძველებური კამერების, მედლების, ყანწებისა და ათასგვარი უცნობი თუ კარგად ნაცნობი ნივთის თვალიერებაში ვერც კი გაიგებ, დრო ისე გაგექცევა.

5. ფლი მარკეტზე ან თბილისურ ბაზარზე საინტერესო ნივთების თვალიერება

თუ გული ფერადი გარემოს, მომღიმარი ადამიანებისა და საინტერესო ხელნაკეთი ნივთებისკენ მიგიწევს, შეგიძლია, უქმეებზე ფლი მარკეტს ან თბილისურ ბაზარს ესტუმრო. სასიამოვნო გარემო კარგ ხასიათზე დაგაყენებს, ხელნაკეთი ნივთები კი შესაძლოა შენი შთაგონების წყაროდაც კი იქცეს. სამახსოვროდ პატარა გულსაბნევის, სანიშნის ან სტიკერის ყიდვასაც მოახერხებ.

6. ნარიყალაზე ასვლა და ულამაზესი ხედით ტკბობა

რამდენი წელიც არ უნდა გაატარო თბილისში, ნარიყალაზე ასვლა და ქალაქის ხედით ტკბობა ზედმეტი არასდროსაა. ხელისგულზე გადაშლილი თბილისი დროებით ყველა პრობლემას გადაგავიწყებს და განტვირთვაშიც დაგეხმარება.

7. ქართული სტოუნჰენჯის აღმოჩენა

ქვების სვეტებისგან შექმნილი მონუმენტი, სახელად "საქართველოს მატიანე", რომელიც ნაძალადევის რაიონში თემქაზე, ყეენის მთაზე მდებარეობს, ცნობილ სტოუნჰენჯს მოგაგონებს. 10 ლარად ინგლისში ვერ წახვალ, თუმცა ქართული სტოუნჰენჯის მონახულებასა და სასიამოვნო ხედით ტკბობას მოახერხებ. შეგახსენებ, რომ შეზღუდული ბიუჯეტის გამო შეგიძლია, დანიშნულების ადგილამდე ავტობუსით მიხვიდე.

8. თბილისის ბოტანიკურ ბაღში სიმწვანით ტკბობა

გადატვირთული ქუჩებისა და ხმაურისგან თავის დასაღწევად ბოტანიკურ ბაღში გასეირნება მშვენიერი შესაძლებლობაა. სუფთა ჰაერის ჩაყლაპვის გარდა, მშვენიერი ფოტოების გადაღება და ჩემი ფავორიტი ციცქნა იაპონური ბაღის მონახულებაც შეგიძლია.

9. ბუკინისტურ წიგნებში ქექვა

თუ წიგნები შემოგაკლდა, ბუკინისტებში გასეირნებას არაფერი სჯობს. შეღავათიან ფასად ძალიან ბევრი საინტერესო ნაწარმოების აღმოჩენას შეძლებ. 10 ლარად შეიძლება, რამდენიმე წიგნიც კი მოგივიდეს. ჩემი საყვარელი ადგილი მარჯანიშვილის მეტროს მიმდებარე ტერიტორიაა, სადაც ბევრი კარგი წიგნი აღმომიჩენია.

10. მშვიდ კაფეში ყავის დალევა და საყვარელი წიგნის კითხვა

თუ გინდა, თავი რომელიმე რომანის გმირად იგრძნო, კაფეში უნდა მოკალათდე და საყვარელი წიგნითა და ყავის არომატით დატკბე. ამ გზით სამი თვის წინ დაწყებული წიგნის დასრულების გარდა, მოსაწყენ ყოველდღიურობას ცოტა ჯადოსნობასაც შემატებ. აქვე შეგახსენებ, რომ ჯიბეში მხოლოდ 10 ლარი გიდევს, ამიტომ მენიუმ არ უნდა შეგაცდინოს!

10 ლარად რომ მოგზაურობას, გასართობი ადგილების დალაშქვრასა თუ საყვარელ კაფეში დანაყრებას ვერ შეძლებ, სულაც არ ნიშნავს იმას, რომ სახლში მოწყენილი უნდა დარჩე. მოკიდე ხელი მეგობარს ან ისიამოვნე საკუთარ თავთან მარტო ყოფნით და შეერიე ქალაქს, რომელშიც კარგი მოგონებებისა და განწყობის შესაქმნელად ხშირად სურვილი და მონდომებაც საკმარისია!

თუ თბილისის შესახებ საინტერესო ამბების გაგება კიდევ გსურს, შემოგვიერთდი ჯგუფში რა ხდება თბილისში.

ამავე თემაზე:

• 10 მუზეუმი და გალერეა თბილისში, რომელსაც აუცილებლად უნდა ესტუმრო;
• თბილისის კედლის ნახატები, რომლებიც აუცილებლად უნდა ნახო.