ვაგზლის მოედანზე, შემთხვევის ადგილზე კახი კალაძე მივიდა. კალაძემ მედიას განუცხადა, რომ ეს უბედური შემთხვევა იყო და მოსახლეობას შენობის ავარიულობაზე ინფორმაცია ჰქონდათ. კალაძემ დასძინა, რომ შენობის მცხოვრებლებს ნაწილმა უარი განაცხადა "ჩანაცვლების პროგრამაში" მონაწილეობაში და ამის გამო ვერ აიცილეს ტრაგედია თავიდან.

"სამწუხროდ, მოხდა უბედური შემთხვევა, ერთი ადამიანი არის გარდაცვლილი, ერთი არის დაშავებული, რომელსაც კლინიკაში უტარდება მკურნალობა. კორპუსი იყო ავარიული, მე-5 კატეგორიის ავარიულობა ჰქონდა მინიჭებული, არ ექვემდებარებოდა რეაბილიტაციას, ეს იცოდა ადგილობრივმა მოსახლეობამ. არაერთი შეხვედრა იქნა გამართული დიდუბის რაიონის გამგეობაში...

იყო შეთავაზება, რომ მონაწილეობა მიეღოთ ჩანაცვლების პროგრამაში და ჩვენ უზრუნველვყოფდით დემონტაჟს და ახალი კორპუსის სამშენებლო სამუშაოებს, თუმცა, სამწუხაროდ, თქვენ იცით, რომ ამ პროგრამის განხორციელებას სჭირდება მოსახლეობის 100%-ის თანხმობა, რომელიც ჯერ ვერ იქნა მიღწეული. რამდენიმე ოჯახი, რომელმაც თანხმობა განაცხადა, გაყვანილია ქირით," — თქვა კალაძემ.

შეგახსენებთ, ოფიციალური ინფორმაციით, სადგურის მოედანზე შენობის ჩამონგრევის შედეგად 1 ადამიანი დაიღუპა, 1 — დაშავდა. ეს ინფორმაცია ქართული ოცნების შინაგან საქმეთა მინისტრმა, გელა გელაძემ მედიას დაუდასტურა.

"გამოძიება მიმდინარეობს 240-ე მუხლით. ამ ეტაპზე რაც შემიძლია დაგიდასტუროთ, რომ მხოლოდ 1 ადამიანი არის კლინიკაში გადაყვანილი, კონტაქტურია, უტარდება სამედიცინო დახმარება. ამ ეტაპზე, ასევე შეგვიძლია დავადასტუროთ, რომ მხოლოდ 1 ადამიანი არის გარდაცვლილი," — განაცხადა გელაძემ.