ზელენსკიმ უკრაინის მთავრობის ხელმძღვანელობა ეკონომიკის მინისტრ იულია სვირიდენკოს შესთავაზა. პრემიერმინისტრ დენის შმიგალის გადადგომის შესახებ ინფორმაცია არ გავრცელებულა

უკრაინის პრეზიდენტი ვოლოდიმირ ზელენსკი პირველ ვიცეპრემიერს - ეკონომიკის მინისტრ იულია სვირიდენკოს შეხვდა და მას მთავრობის ხელმძღვანელობა შესთავაზა.

"მე იულია სვირიდენკოს შევთავაზე უკრაინის მთავრობის ხელმძღვანელობა და მისი მუშაობის მნიშვნელოვნად განახლება. უახლოეს მომავალში ახალი მთავრობის სამოქმედო პროგრამის წარდგენას ველოდები", — განაცხადა ზელენსკიმ სოციალურ ქსელებში.

პრეზიდენტმა ასევე განაცხადა, რომ შეხვედრის დროს მან სვირიდენკოს მოხსენება მოისმინა ევროპელ და ამერიკელ პარტნიორებთან უკრაინის მხარდაჭერის შესახებ შეთანხმებების შესრულების შესახებ.

"ჩვენ ასევე განვიხილეთ კონკრეტული ზომები, რომლებსაც შეუძლიათ უკრაინის ეკონომიკური პოტენციალის გაძლიერება, უკრაინელებისთვის დახმარების პროგრამების გაფართოება და საკუთარი იარაღის წარმოების გაფართოება. ამ მიზნით, ჩვენ ვიწყებთ უკრაინაში აღმასრულებელი ხელისუფლების სისტემის ტრანსფორმაციას", — განაცხადა უკრაინის ლიდერმა.

სვირიდენკოს უკრაინის მთავრობის მეთაურად დანიშვნის შესახებ ადრე უკრაინული გამოცემების წყაროებმა განაცხადეს. თავად ზელენსკიმ "აღმასრულებელი ხელისუფლების ტრანსფორმაცია" 13 ივლისს, მოქმედ პრემიერმინისტრ დენის შმიჰალთან შეხვედრის შემდეგ დაჰპირდა.

როგორც "უკრაინსკა პრავდა" წყაროებზე დაყრდნობით იტყობინება, უკრაინის უმაღლესი რადა 16 ივლისს მთავრობის დათხოვნას და მეორე დღეს ახალი მინისტრების დანიშვნას გეგმავს.

2020 წლის მარტიდან უკრაინის პრემიერ-მინისტრის თანამდებობას დენის შმიჰალი იკავებს. მისი გადადგომის შესახებ ინფორმაცია არ გავრცელებულა.