ვაგზლის მოედნის მიმდებარე ტერიტორიაზე ერთ-ერთი კორპუსის სახურავი და ფასადის ნაწილი ჩამოინგრა. არის მსხვერპლი. შსს მომხდარ ნგრევას ეხმაურება და განცხადებას ავრცელებს. უწყების ცნობით, ამ მომენტისთვის, აქტიური სამძებრო-სამაშველო ოპერაციის პარალელურად ტერიტორიის ნანგრევებისგან წმენდა მიმდინარეობს. გთავაზობთ განცხადებას უცვლელად:

"შინაგან საქმეთა სამინისტროს მიერ, თბილისში, „სადგურის მოედნის“ მიმდებარე ტერიტორიაზე მდებარე ერთ-ერთ საცხოვრებელ კორპუსში მომხდარი ნგრევის შესახებ შეტყობინების მიღებისთანავე, მოხდა საგანგებო სიტუაციების მართვის სამსახურის მეხანძრე-მაშველებისა და საპოლიციო ძალების მობილიზება.

ადგილზე მისვლისთანავე, მეხანძრე-მაშველებმა ჩამონგრეული შენობის მიმდებარე ტერიტორიიდან მყისიერად განახორციელეს მოქალაქეების ევაკუაცია.
მიმდინარეობს ტერიტორიის ნანგრევებისგან გაწმენდა და აქტიური საძიებო-სამაშველო ღონისძიებები. ადგილზე იმყოფებიან სასწრაფო სამედიცინო დახმარების თანამშრომლები.
შინაგან საქმეთა სამინისტრო მოუწოდებს მოქალაქეებს, ასევე, ადგილზე მყოფ ყველა მედიასაშუალების წარმომადგენელს, დაემორჩილონ შინაგან საქმეთა სამინისტროს თანამშრომლების მითითებებს და დაიცვან უსაფრთხოების ნორმები", — ნათქვამია უწყების მიერ გავრცელებულ განცხადებაში.