თბილისის საქალაქო სასამართლოში დღეს, 14 ივლისს, მზია ამაღლობელის საქმეზე გამართულ პროცესზე მოსამართლე ნინო სახელაშვილმა არ დააკმაყოფილა დაცვის მხარის შუამდგომლობები დაკითხულიყვნენ ოცნების პრემიერი ირაკლი კობახიძე და ოცნების პარლამენტის ვიცესპიკერი ნინო წილოსანი.

ადვოკატებმა დაკითხვის თაობაზე შუამდგომლობები მას შემდეგ დააყენეს, რაც წილოსანმა და კობახიძემ თქვეს, რომ მზია ამაღლობელი დაკვეთით მოქმედებდა.

"კაცის და ქალის ანტისტანდარტია, როდესაც მეორე ადამიანს ურტყამ სახეში. განსაკუთრებით, როდესაც მეორე ადამიანი შეიძლება იყოს პოლიციელი, რომელმაც ზუსტად იმ მოქალაქის უფლებები და მისი უსაფრთხოება უნდა დაიცვას და როდესაც ეს სახეში გარტყმა ხდება დაკვეთით, ფულის გადახდით, დაქირავებით და აგენტურული საქმიანობის ფარგლებში", – თქვა წილოსანმა 26 ივნისს ჟურნალისტებთან.

უკანონოდ დაკავებულ ჟურნალისტზე ირაკლი კობახიძემაც თქვა, რომ ის დაკვეთით მოქმედებდა. კობახიძის თქმით, ამის მიზანი პოლიციის პრესტიჟის შელახვა იყო. ადვოკატების თქმით, ეს განცხადებები მხოლოდ პოლიტიკური შეფასება არ არის და ჩანს, რომ ისინი თითქოს გარკვეულ ინფორმაციას ფლობენ.

ნინო წილოსანის დაკითხვაზე შუამდგომლობა 4 ივლისს, ხოლო ირაკლი კობახიძის დღევანდელ სხდომაზე დააყენეს.