2016 წლის განმავლობაში საქართველოს პერსონალურ მონაცემთა დაცვის ინსპექტორმა 221 სამართალდარღვევის შემთხვევა გამოავლინა. მათგან ნაწილს ჯარიმა დაეკისრა, ნაწილს მონაცემთა დაცვა დაევალა, ნაწილ შემთხვევაში კი უფლებამოსილ სამართალდამცავ ორგანოებს გადაეგზავნათ. პერსონალურ მონაცემთა დაცვის ინსპექტორის აპარატმა გასული წლის მონაცემების შედეგები დღეს გაასაჯაროვა.

სამართალდარღვევის 221 შემთხვევიდან: 63 ორგანიზაციას დაეკისრა ჯარიმა; 35-ს გაფრთხილება; არაერთ საჯარო და კერძო დაწესებულებას დაევალა მონაცემთა დაცვის უზრუნველსაყოფად სათანადო ორგანიზაციულ-ტექნიკური ზომების გატარება და ამ მიზნით გაიცა 202 მითითება და რეკომენდაცია; 47 შემთხვევაში, კანონმდებლობით გათვალისწინებული ხანდაზმულობის ვადის გამო პასუხისმგებლობის დაკისრება ვერ მოხდა, ხოლო 6 შემთხვევაში, დანაშაულის ნიშნების არსებობიდან გამომდინარე, საქმე გადაეცა უფლებამოსილ სამართალდამცავ ორგანოს.

საჯარო სექტორში პერსონალური მონაცემების დაცვის ინსპექტორმა ყველაზე მეტი შემთხვევა (35) საქართველოს მთავარ პროკურატურაში შეისწავლა, რომელსაც მოჰყვებოდა საქართველოს შინაგან საქმეთა სამინისტრო (14) და სასჯელაღსრულების სამინისტრო (9). რაც შეეხება კერძო კომპანიებს, კერძო სექტორში ყველაზე მეტი შემთხვევა (59) ონლაინსესხების და სესხის ამომღები კომპანიებში შეისწავლეს, რომელსაც მარკეტინგის განმახორციელებელი კომპანიები (39) და ბანკების, მიკროსაფინანსო კომპანიებისა და კრედიტინფო (37) მოჰყვებოდა.

ფოტო: პერსონალურ მონაცემთა დაცვის ინსპექტორის აპარატი

ანგარიშში ვკითხულობთ, რომ ე.წ. სარეკლამო შეტყობინების - პირდაპირი მარკეტინგის წესის დარღვევის შესწავლის მოთხოვნით ინსპექტორს 2016 წელს 48 მოქალაქემ მიმართა. აქედან, გამოვლინდა დარღვევის 30 შემთხვევა, 27 შემთხვევაში დამრღვევ ორგანიზაციას დაეკისრა ჯარიმა, ხოლო სამ შემთხვევაში სანქციის შეფარდება ვერ მოხდა კანონმდებლობით განსაზღვრული ხანდაზმულობის ვადის გასვლის გამო.

როგორც ანგარიშშია ასახული, 2015 წელთან შედარებით 2016-ში სამჯერ გაიზარდა მოქალაქეების, საჯარო და კერძო ორგანიზაციებისთვის გაწეული კონსულტაციების რაოდენობა; ფიზიკური პირების განცხადებებისა და ინსპექტირების რიცხობრივი მაჩვენებელი კი ორჯერ.