ყოფილი პრემიერმინისტრისა და პარტია საქართველოსთვის ლიდერის, გიორგი გახარიას განცხადებით, როცა დარწმუნდა, რომ სხვები მის კომპეტენციაში ერეოდნენ, ქართული ოცნების დამფუძნებელთან, ბიძინა ივანიშვილთან დაკავშირება სცადა, რაც ვერ მოხერხდა. გახარიას თქმით, ამის შემდეგ ჟურნალისტებს დაუძახა და გადადგომაზე განცხადება გააკეთა.

"მე მქონდა მცდელობა დაკავშირების [ივანიშვილთან], სწორედ მაშინ, როდესაც დავრწმუნდი, რომ ადამიანები, რომლებსაც ამის არანაირი შესაძლებლობა არ ჰქონდათ და ვერასდროს ამას ვერ გაბედავდნენ, ერეოდნენ ჩემს კომპეტენციაში, მქონდა მცდელობა დაკავშირების, იმისთვის, რომ გამერკვია, რა ხდებოდა. ეს კავშირი ვერ შედგა და ამის შემდგომ მე დავუძახე ჟურნალისტებს და გავაკეთე ის განცხადება, რომელიც გავაკეთე", — თქვა მან.

გახარიას განცხდებით, მას პარტიის წინაშე არცერთი პროცედურული ნაბიჯი არ დაურღვევია და როცა ნახა, რომ კომპრომისს კონკრეტულ ადამიანებთან ვერ პოულობდა, პოლიტსაბჭო მოიწვია, რაზეც უარი უთხრეს.

"მე არცერთი პროცედურული ნაბიჯი პარტიის წინაშე არ დამირღვევია, მე როდესაც ვნახე, რომ პარტიის დღევანდელ ხელმძღვანელობასთან კომპრომისი ვერ ვიპოვე, მოვითხოვე პოლიტსაბჭოს შეკრება დილით ადრე. ეს ხდება 18-ში დილით ადრე. შესაბამისი ინფორმაცია გავაგზავნე — იმიტომ, რომ მე ვერ მივაღწიე ამასთან, ამასთან ამადაამ საკითხზე შეთანხმეაბს, გთხოვთ, სასწრაფოდ მოვიწვიოთ პოლიტსაბჭო, სადაც გაგაცნობთ ჩემს პოზიციას და დავაფიქსირებ ჩემს პოლიტიკურ პოზიციას — უარი მითხრეს", — თქვა მან.

18 თებერვალს გიორგი გახარია პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.