დღეს დაესვა წერტილი იმ საკონსტიტუციო გადატრიალებას, რომელიც დაწყებულია უკვე რამდენიმე კვირაა, თუ თვეა, — ამის შესახებ საქართველოს პრეზიდენტმა, სალომე ზურაბიშვილმა ბრიფინგზე განაცხადა, რომელიც ოპოზიციურ პარტიებთან ერთად გამართა.

პრეზიდენტის თქმით, დღეს ამ არარსებულმა, არალეგიტიმურმა ხელისუფლებამ გამოუცხადა არა მშვიდობა, არამედ ომი საკუთარ ხალხს.

"დღეს დაესვა წერტილი იმ საკონსტიტუციო გადატრიალებას, რომელიც დაწყებულია უკვე რამდენიმე კვირაა, თუ თვეა. დღეს დაესვა წერტილი იმ მსვლელობას, რომელიც დაწყებული იყო რამდენიმე თვეა, ევროპიდან რუსეთისკენ. ყველა, ვისაც ჰქონდა რაიმე ეჭვი, რომ არა, შეიძლება რაღაც სხვა არის, ყველა ეს ეჭვი გაიფანტა დღეს", — განაცხადა პრეზიდენტმა ბრიფინგზე, რომელიც ოპოზიციურ პარტიებთან ერთად გამართა.