ქართველი მუსიკოსი, გიორგი იოსელიანი, იგივე Kazzy Jazz 28 წლის ასაკში გარდაიცვალა. სამწუხარო ინფორმაცია დღეს დილით გავრცელდა და მას ჰიპ-ჰოპ შემსრულებლის მეგობარი, ლაშა მესხიც ადასტურებს. სხვადასხვა გამოცემას ინფორმაცია ირაკლი ქოჩიაშვილმა, სასცენო სახელით თერიკამ დაუდასტურა. ქართული ჰიპ-ჰოპის მსმენელისთვის ცნობილია მათი კოლაბორაციის ფარგლებში შექმნილი ჩანაწერი, მძიმე წონა.

დაუდასტურებელი ინფორმაციით, გარდაცვალების მიზეზი თრომბი გახდა.

როგორც ქართული მუსიკალური გამოცემა Popmusic წერს, რეპერმა შემოქმედებითი საქმიანობა 10 წლის წინ დაიწყო. მან განსაკუთრებული პოპულარობა 2015 წელს, პროექტ ჩემი ქალაქის ფარგლებში გამოსული ნამუშევრით მოიპოვა.

"ქართული ჰიპ-ჰოპის სცენამ ერთგული, მებრძოლი, სიმართლის მთქმელი და მართლა შესანიშნავი არტისტი დაკარგა", — წერს კლუბ BASSIANI-ს თანამფლობელი ნაჯა ორაშვილი ფეისბუქზე.