ზურაბ ჯაფარიძე შარლ მიშელის ახალ დოკუმენტს ხელს მოაწერს. ამის შესახებ მან Facebook-ზე დაწერა.

ჯაფარიძე ამის სამ მიზეზს ასახელებს: პოლიტიკოსების გათავისუფლების მექანიზმი, სტრატეგიული პარტნიორების აზრის გათვალისწინება და შანსი, რომ შემდეგი ორი საპარლამენტო არჩევნები ჩატარდეს სრულად პროპორციულად და დაბალი ბარიერით, რამაც, ჯაფარიძის თქმით, უნდა დაასრულოს არსებული პოლარიზაცია და ერთპარტიული მმართველობა.

ამასთან, ჯაფარიძის თქმით, არ სჯერა, რომ ამ დოკუმენტით მოხდება კრიზისის განმუხტვა, მართლმსაჯულების სისტემას "რამე ეშველება", მნიშვნელოვნად გაუმჯობესდება საარჩევნო გარემო, ძალაუფლების რეალური გადანაწილება ოპოზიციაზე, დასრულდება პოლიტიკური დევნა. გარდა ამისა, გირჩი — მეტი თავისუფლების ლიდერს არ სჯერა, რომ ივანიშვილი და ქართული ოცნება ამ დოკუმენტის პუნქტებს ზედმიწევნით შეასრულებენ.

"რისიც მჯერა არის ბრძოლა, მუდმივი ბრძოლა. ეს ქვეყანა არ გახდება თურქმენეთი, არასდროს", — აცხადებს ჯაფარიძე.

ის ასევე იმედოვნებს, რომ მისი გადაწყვეტილება მხოლოდ სიმბოლური აღმოჩნდება, რადგან 22-23 აპრილს აქვს პროცესი საკონსტიტუციო სასამართლოში, სადაც ითხოვს საქართველოს პარლამენტის იმ დადგენილების არაკონსტიტუციურად ცნობას, რომლითაც უარი ეთქვა მანდატის გაუქმებაზე.

ჯაფარიძის თქმით, აპირებს ეს ბრძოლა ბოლომდე მიიყვანოს, მანამდე კი პარლამენტში მონაწილეობას მიიღებს მხოლოდ შეთანხმების დოკუმენტით გათვალისწინებული საკითხების განხილვა/გატანაში.

"და ბოლოს: მადლობა ყველა ჩვენს მეგობარს, ვინც თვეების განმავლობაში ჩართული იყო მოლაპარაკებების პროცესში, განსაკუთრებით აშშ-ს და ევროკავშირის ელჩებს საქართველოში. არ მგონია ბოლომდე გვქონდეს გააზრებული რას ნიშნავს ასეთი მეგობრების ყოლა", — წერს ჯაფარიძე.

18 აპრილს ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტი ხუთპუნქტიანია, რომელიც მოიცავს პოლიტიკოსების გათავისუფლებასაც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: