ვაშლიჯვარში მეწყრული პროცესის მართვის გამჭვირვალობისა და მოსახლეობის ჩართულობის მოთხოვნით აქცია მიმდინარეობს. ისინი, ასევე, ყველას მოუწოდებენ ხელი მოაწერონ პეტიციას.

"ის უკონტროლო მშენებლობები, რომლებიც ძალიან მომრავლდა ბოლო წლებში მიგვაჩნია, რომ საფრთხისშემცველია ჩვენი სიცოცხლისთვის და ეს გამოვლინდა პირდაპირი მაგალითის მეშვეობით. ვერავინ ვერ წარმოიდგენდა, რომ ამხელა მეწყერი გვექნებოდა თავზე", — განაცხადა ადგილობრივმა მცხოვრებმა, რუსუდან ფანოზიშვილმა.

აქციის მონაწილეებს შეუერთდნენ პოლიტიკოსებიც.

"სოლიდარობას ვუცხადებ და გვერდში ვიქნები მოსახლოების, რა თქმა უნდა", — ამბობს პოლიტიკური მოძრაობა დროას ლიდერი, ელენე ხოშტარია.

თბილისის მერიისა და გარემოს დაცვის სამინისტროს მიმართ მოსახლეობის მოთხოვნებია:

  • გამოცხადდეს მორატორიუმი ვაშლიჯვარში ყველა ტიპის მშენებლობაზე, საშიშროების გათვალისწინებით, მათ შორის, გაჩერდეს განხილვის პროცესში არსებულ სამშენებლო მოთხოვნებზე დასკვნების გაცემა;
  • დაუყოვნებლივ შეიქმნას დამოუკიდებელ ქართველ და საერთაშორისო ექსპერტთა ჯგუფი, რომელიც გამოიკვლევს ლისის ქედს სრულად და მის რისკებს და რომელთა ვინაობაც გასაჯაროვდება. სამუშაო ჯგუფში ჩართულნი იყვნენ ადგილობრივი მოსახლეობის წარმომადგენლები და გაიმართოს საჯარო განხილვები;
  • მერიამ ლისის დაზიანებულ ფერდზე სამონიტორინგო სისტემა დაამონტაჟოს, რომელიც ფერდს 24-საათიან რეჟიმში დააკვირდება და საჯარო წესით საზოგადოებას მუდმივად მიაწოდოს ამის შესახებ ინფორმაცია;
  • შეწყდეს მაჭავარიანის ქუჩიდან მიმავალი ესტაკადის მშენებლობა და არ გაიხსნას მაჭავარიანის ქუჩა იქამდე, ვიდრე არ ვნახავთ ექსპერტიზის პასუხებს და დასკვნებს, რომლებიც მათ უსაფრთხოებას დაადასტურებს;
  • შესწავლილი იყოს და გასაჯაროვდეს მთლიანად ვაშლიჯვრის უბნის გეოლოგიური ანალიზი.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.