ქუთათელ-გაენათელი მიტროპოლიტი იოანე კორონავირუსის ვაქცინაზე, AstraZeneca-ზე დეზინფორმაციას ავრცელებს. მიტროპოლიტი არგუმენტების გარეშე ირწმუნება, რომ აღნიშნული ვაქცინა "აბორტის მსხვერპლისგან არის დამზადებული". მართლმადიდებელი ეკლესიის სინოდის წევრმა ამის შესახებ ინფო რუსთავის კითხვის საპასუხოდ თქვა.

"მე ჩემი სიტყვა ვთქვი და მთავრობამ თავის სიტყვა თქვას. არის მეორეც, Pfizer, მაგრამ რომელს შემოიტანს ხელისუფლება, ეს მისი საქმეა, ჩვენ რელიგიური მოტივით შეგვიძლია ვთქვათ უარი. გვაქვს უფლება მოვითხოვოთ ის, რომელიც ჩვენთვის მისაღებია", — განაცხადა სასულიერო პირმა.

მიტროპოლიტის განცხადება ვაქცინაზე ერთ-ერთ გავრცელებულ მითს ეყრდნობა, თითქოს მისი შექმნისას იყენებენ ჩანასახის ფილტვის ქსოვილს აბორტის შემდეგ. ეს ტყუილია. ერთ ცალკეულ ვიდეოში, რომელიც Facebook-ის ერთ-ერთ ყველაზე დიდ ანტივაქსერულ გვერდზე დაიდო, საუბარია კვლევაზე, რომელიც, ნარატორის თქმით, იმის მტკიცებულებაა, თუ რისგან შედგება ის ვაქცინა, რომელსაც AstraZeneca და ოქსფორდის უნივერსიტეტი ქმნიან. თუმცა ნარატორის ინტერპრეტაცია მცდარია — ამ კვლევამ შეისწავლა, თუ როგორ რეაგირებდა ვაქცინა ლაბორატორიაში ადამიანის უჯრედებში შეყვანისას.

დაბნეულობა, შესაძლოა, იმან გამოიწვია, რომ ვაქცინის შექმნის პროცესში არის ერთი ეტაპი, რომლის დროსაც ლაბორატორიაში გამოზრდილ უჯრედებს იყენებენ, რომლებიც იმ ემბრიონული უჯრედების შთამომავლები არიან, რომლებიც სხვა შემთხვევაში განადგურდებოდა. ეს ტექნიკა 1960-იანებში შემუშავდა და კვლევის მიზნებისთვის არც ერთი ორსულობა არ შეწყვეტილა.

ბრისტოლის უნივერსიტეტის დოქტორი დევიდ მეთიუზი განმარტავს, რომ ბევრი ვაქცინა კეთდება ამ გზით, და ამატებს, რომ ამ უჯრედების ნებისმიერი კვალი ვაქცინას საგულდაგულოდ შორდება "ძალიან მაღალი სტანდარტით".

ოქსფორდის უნივერსიტეტში ვაქცინის შემქმნელები ამბობენ, რომ ისინი კლონირებულ უჯრედებზე მუშაობდნენ, მაგრამ თვითონ ეს უჯრედები შეწყვეტილი ორსულობის შედეგად არ მიუღიათ. ეს უჯრედები ქარხნის როლს ასრულებს და აწარმოებს ვირუსის ძალიან დასუსტებულ ფორმას, რომელიც ისეა ადაპტირებული, რომ ვაქცინასავით იმოქმედოს.

და, მიუხედავად იმისა, რომ დასუსტებული ვირუსი ამ კლონირებული უჯრედების გამოყენებით იქმნება, ვირუსის გაწმენდის შემდეგ ეს უჯრედული მასალა სრულად შორდება ვაქცინას და მასში არ გამოიყენება.

ზოგადად, ვაქცინები არ იწვევს დაავადებებს. სანაცვლოდ, ვაქცინა ასწავლის ჩვენი ორგანიზმის იმუნურ სისტემას, რომ შეამჩნიოს ინფექციები და ებრძოლოს მათ.

თუმცა, ვაქცინის მიღების შემდეგ ადამიანთა ნაწილი მაინც განიცდის გარკვეულ სიმპტომებს, რომლებიც, რა თქმა უნდა, რომელიმე დაავადებას არ უკავშირდება. ეს უბრალოდ სხეულის საპასუხო რეაქციას წარმოადგენს ვაქცინაზე.

ყველაზე გავრცელებული რეაქციები, რომლებიც, საშუალოდ, 10-დან 1 ადამიანზე მეტში ვლინდება და შემდეგ რამდენიმე დღეში ქრება, მოიცავს: მკლავის ტკივილს, თავის ტკივილს, შეციებას, დაღლილობას, ავად ყოფნის შეგრძნებას, ცხელებას, თავბრუსხვევას, სისუსტეს, კუნთების ტკივილს.