ევროპული საქართველოს ერთ-ერთი ლიდერი, დავით ბაქრაძე, ნაციონალური მოძრაობის თავმჯდომარეს, ნიკა მელიას ურჩევს, თავი აარიდოს გარეთ გასვლას მანამ, სანამ პოლიტიკური ვითარება არ გაირკვევა.

"ჩემი რჩევა ნიკა მელიას მიმართ იქნებოდა, რომ სანამ ვითარება პოლიტიკურად არ გაირკვევა და არ დალაგდება, თავი აარიდოს გარეთ გასვლას, თავი აარიდოს ხელისუფლების მხრიდან პროვოცირების შესაძლებლობას. ნუ მივცემთ შანსს ხელისუფლებას, რომ ამ შემთხვევაში და ამ საქმეში, სადაც თავიდან ბოლომდე მტყუანია, მიაღწიოს ისეთ გამარჯვებას, რომელიც შემდეგ, ქვეყანაში მოიტანს დაპირისპირებებისა და დაძაბულობების მორიგ ტალღას", — განაცხადა დავით ბაქრაძემ.

იგი ფიქრობს, რომ მმართველი პარტიის რადიკალური ნაწილი, საკუთარი ძალაუფლების დემონსტრირებისთვის მზადაა ქვეყანა სამოქალაქო დაპირისპირებამდე მიიყვანოს.

"ამ რიტორიკის ფონზე, როდესაც "ოცნების" რადიკალური ნაწილი, ჯერ კიდევ, მთავარ ამოცანად მიიჩნევს არა ამ ქვეყანაში სიმშვიდეს და მშვიდობას, არამედ საკუთარი ძალაუფლების დემონსტრირების გამო ქვეყნის სამოქალაქო დაპირისპირებამდე მიყვანას, როცა ასე უყურებს დღევანდელი ოცნების ხელისუფლება, რა თქმა უნდა საფრთხე არსებობს", — ამბობს ბაქრაძე.

გუშინ, ნიკა მელიამ განაცხადა, რომ არ გამოიკეტება და უახლოეს დღეებში ნაციონალური მოძრაობის ოფისის გარეთ აქტივობებს დაგეგმავს.

ნიკა მელია უკვე რამდენიმე დღეა, მას შემდეგ, რაც დეპუტატის იმუნიტეტი მოუხსნეს, ნაციონალური მოძრაობის ოფისში რჩება. მასთან ერთად არიან ოპოზიციონერი ლიდერები, რომლებიც აცხადებენ, რომ საჭიროების შემთხვევაში მელიას ფიზიკურადაც დაიცავენ.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. 18 თებერვალს, დილით პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.