ნიკა მელიას საქმის მოსამართლე ნინო ჩახნაშვილმა არ დააკმაყოფილა ადვოკატების შუამდგომლობა აცილების შესახებ. ის რამდენიმე წუთით სათათბიროდ იყო გასული, სასამართლო დარბაზში დაბრუნების შემდეგ კი უარი განაცხადა.

მისი განცხადებით, შუამდგომლობა არის დაუსაბუთებელი და არ არის წარდგენილი მტკიცებულებები, რომელიც აცილების საფუძველი გახდებოდა. მანვე აღნიშნა, რომ სასამართლო გადაწყვეტილებას კანონით განსაზღვრული წესით იღებს და არავის გავლენის ქვეშ არ ექცევა.

ნიკა მელიას ადვოკატებმა, დიმიტრი საძაგლიშვილმა, ბექა ბასილაიამ და გიორგი კონდახიშვილმა მოსამართლის აცილება მას შემდეგ მოითხოვეს, რაც გავრცელდა კადრები, რომელშიც ჩანს, რომ ნაციონალური მოძრაობის მიმდებარედ სპეცდანიშნულების რაზმები ემზადებიან. მათი განმარტებით, კითხვის ნიშნის ქვეშ დადგა მისი მიუკერძოებლობის საკითხი, რადგან სპეცრაზმის ბოლიზიება იმაზე მიანიშნებს, რომ მელიას პატიმრობის გადაწყვეტილება უკვე მიღებულია.

ტელეკომპანია ფორმულამ, შემდეგ კი სხვა ტელევიზიებმა გაავრცელეს კადრები, რომელშიც ჩანს, რომ შსს-ს განსაკუთრებულ დავალებათა დეპარტამენტის ეზოში სპეცდანიშნულების რაზმები არიან. კადრებში ჩანს, რომ სამართალდამცავები მანქანებიდან იღებენ ეკიპირებას, ფარებსა და ხელკეტებს.

შეგახსენებთ, რომ ნაციონალური მოძრაობის ოფისში ნიკა მელია და მისი მხარდამჭერები, მათ შორის ოპოზიციონერი პოლიტიკოსები არიან შეკრებილი. მელია აცხადებს, რომ მას ვერ დაიჭერენ და უკანონო გადაწყვეტილებას არ დაემორჩილება, პოლიტიკოსები კი ამბობენ, რომ მელიას არ გაატანენ.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.