ნიკა მელიას ადვოკატებმა, დიმიტრი საძაგლიშვილმა, ბექა ბასილაიამ და გიორგი კონდახიშვილმა მოსამართლის აცილება მოითხოვეს. მათი განმარტებით, კითხვის ნიშნის ქვეშ დადგა მისი მიუკერძოებლობის საკითხი, რადგან ნაციონალური მოძრაობის მიმდებარედ წინასწარ ხდება სპეცდანიშნულების რაზმების მობილიზება, რაც იმაზე მიანიშნებს, რომ მელიას პატიმრობის გადაწყვეტილება უკვე მიღებულია.

"როგორც ჩანს, არათუ მათთვის არის წინასწარ ცნობილი გადაწყვეტილება, არამედ ელემენტარული პატივისცემაც კი არ გააჩნიათ თქვენს მიმართ, რომ დალოდებოდნენ მათ მიერ მიღებული გადაწყვეტილების თუნდაც გაჟღერებას თქვენს მიერ, აი, ამ დარბაზში.

სისხლის სამართლის საპროცესო კოდექსის 59-ე მუხლის პირველი ნაწილის "ე" ქვეპუნქტის საფუძველზე არსებობს გარემოება, რომელიც ეჭვქვეშ აყენებს თქვენს დამოუკიდებლობას და მიუკერძოებლობას, ეს თავის მხრივ არის თქვენი, როგორც მოსამართლის მონაწილეობის გამომრიცხავი გარემოება. ზემოაღნიშნულიდან გამომდინარე, მოგმართავთ შუამდგომლობით აიცილოთ ეს საქმე", — განაცხადა დიმიტრი საძაგლიშვილმა.

ბექა ბასილაიამ აღნიშნა, რომ აცილება არის "მაშველი რგოლი", რომელიც პირადად მოსამართლეს სჭირდება, რათა მომავალში არ შერცხვეს იმის გამო, რა მოვლენებიც დღეს, შესაძლოა, განვითარდეს.

ტელეკომპანია ფორმულამ, შემდეგ კი სხვა ტელევიზიებმა გაავრცელეს კადრები, რომელშიც ჩანს, რომ შსს-ს განსაკუთრებულ დავალებათა დეპარტამენტის ეზოში სპეცდანიშნულების რაზმები არიან. კადრებში ჩანს, რომ სამართალდამცავები მანქანებიდან იღებენ ეკიპირებას, ფარებსა და ხელკეტებს.

შეგახსენებთ, რომ ნაციონალური მოძრაობის ოფისში ნიკა მელია და მისი მხარდამჭერები, მათ შორის ოპოზიციონერი პოლიტიკოსები არიან შეკრებილი. მელია აცხადებს, რომ მას ვერ დაიჭერენ და უკანონო გადაწყვეტილებას არ დაემორჩილება, პოლიტიკოსები კი ამბობენ, რომ მელიას არ გაატანენ.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.