ნაციონალური მოძრაობის თავმჯდომარის, ნიკა მელიას განცხადებით, გუშინ, 15 თებერვალს ქართული ოცნების დეპუტატი, ვასილ ჩიგოგიძე უკავშირდებოდა და შეხვედრას სთხოვდა. მელია ამბობს, რომ ჩიგოგიძე შეწუხებული იყო მისი იმუნიტეტის საკითხზე და ეუბნებოდა, რომ ღილაკს თითს არ მიაჭერდა. მელიასთან შეხვედრის სურვილი ჩიგოგიძემ On.ge-ს დაუდასტურა, თუმცა სულ სხვა მიზეზი დაასახელა.

"გუშინ ერთი ქართული ოცნების დეპუტატი მეხმიანებოდა, შეხვედრას მთხოვდა, შემხვდი საერთო მეგობრის სახლშიო. მე ვუთხარი და ძალიან ცუდი საუბარი მქონდა, ვუთხარი, რომ არაფერი შენთან სალაპარაკო არა მაქვს, ხვალ ჩატარდება კენჭისყრა, შევხედავ შედეგებს, თუ იქნება შენი ხმა დაფიქსირებული ჩემი დაჭერის სასარგებლოდ, იქნება დანარჩენს მერე მოგახსენებ; არ იქნება და მე დაგირეკავ და მე გნახავ თქო. შვიდჯერ დამირეკა. დღეს ისეთი მისცა ხმა, მგონი ის ღილაკი ჩაამტვრია", — განაცხადა მელიამ TV პირველის ეთერში.

ჩიგოგიძე ამბობს, რომ შეხვედრა იმის განსახილველად სურდა, რაც მელიამ ერთ-ერთ ეთერში მასზე თქვა.

"ნიკა მელიამ გუშინწინ გადაცემაში მახსენა და ვუკავშირდებოდი, რომ რა სიტუაციაში და როგორ მახსენა, არასწორად მახსენა. ვერ დავუკავშირდი ტელეფონზე, მერე მის ადვოკატს ვთხოვე, მინდა დალაპარაკება-მეთქი. არაო, მე არ მინდაო დამირეკა და მეტი არაფერი, ახლა ვერ, მერე დაგელაპარაკებიო. არანაირი საუბარი არ მქონია მაგდაგვარი, რომ რაღაცაზე მელაპარაკა.

შეხვედრა მინდოდა იმის გამოისობით, რომ მან რომ მახსენა, რატომ მახსენა ეგრე-მეთქი, ამის მოთხოვნა მინდოდა, ახსნა", — განაცხადა მან.

მელია ამავე ეთერში აღნიშნა, რომ ჩიგოგიძე ნაციონალური მოძრაობიდან აპირებდა კენჭისყრას, ამაზე შეთანხმდნენ "ხელიც ჩამოართვა" და რამდენიმე დღეში ის ქართული ოცნების რიგებში აღმოჩნდა. ჩიგოგიძე ამბობს, რომ ეს "ზღაპარია" და იყო შეთავაზება, მაგრამ არა თანხმობა. მისი თქმით, ბევრი შეთავაზება ჰქონდა და კენჭი იმისგან იყარა, ვისთანაც სურდა.

"ნაციონალებმა 2012-ში არ დამაყენეს, როცა უნდა დავეყენებინე და ახლა მივიდოდი ნაციონალებთან? სიმართლე იყო, მოვიდა. მე არ მიყვარს ტყუილის თქმა საერთოდ. მან მითხრა, ხო არ იყრი კენჭსო, მე ვუთხარი, შენ რომ არ იყო ნაციონალებში... ჩვენ ერთმანეთი გავიცანით, რაღაცნაირად გვქონდა ურთიეთობები. ვუთხარი, შენ რომ ჩამოგეყალებინა ცალკე პარტია, შეიძლება, მეფიქრა შენთან ერთად, მაგრამ ნაციონალებში რახან ხარ, შენთან არ ვიყრი კენჭს-მეთქი. ეს იყო, მეტი არაფერი.

არც კრებას დავსწრებივარ და არც მოყვრობას, თეორიულად იყო შემოთავაზება. მაგის გარდა ათასი პარტიიდან იყო შემოთავაზება, ხომ არ მეყარა კენჭი. სადაც მინდოდა და ვისგანაც მინდოდა, იმისგან ვიყარე კენჭი. ვერ გავიგე რა კავშირშია მაგის "რემენთან", მაგის საპროცესოსთან ჩემი კენჭისყრა", — განაცხადა მან.

ქართულმა ოცნებამ ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

როგორც უკვე აღვნიშნეთ, ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.