ქართველი რეჟისორის დეა კულუმბეგაშვილის ფილმს დასაწყისი ტრიესტეს საერთაშორისო კინოფესტივალზე მთავარი ჯილდო გადაეცა: ის წლის საუკეთესო ფილმად დასახელდა.

პანდემიის გამო დაჯილდოების ცერემონია ონლაინ გაიმართა და დეა კულუმბეგაშვილმა კიდევ ერთი წარმატების შესახებ თბილისიდან, დისტანციურად გაიგო.

დასაწყისი ახალგაზრდა რეჟისორის პირველი სრულმეტრაჟიანი კინოსურათია, რომელიც გასულ წელს კანის კინოფესტივალის საკონკურსო პროგრამაში მოხვდა. ფილმის მსოფლიო პრემიერა კი სან-სებასტიანის საერთაშორისო კინოფესტივალზე შედგა, სადაც ქართველი ხელოვანის ნამუშევარმა ოთხ მთავარ ნომინაციაში გაიმარჯვა.

წელს ოსკარებზე საქართველოს სახელით სწორედ დეა კულუმბეგაშვილის დასაწყისი იბრძოლებს: საუკეთესო საერთაშორისო სრულმეტრაჟიანი ფილმის კატეგორიაში 15 ფინალისტის ვინაობა 9 თებერვალს გახდება ცნობილი — მოკლე სია, რომლიდანაც შემდეგ 5 საბოლოო კანდიდატი შეირჩევა.

რაც შეეხება ტრისტეს კინოფესტივალზე მიღწეულ წარმატებას, ეს მნიშვნელოვანი სიახლეა ოსკარების ნომინაციების გამოცხადების მოლოდინში, რადგანაც ეს საერთაშორისო ფესტივალი 1989 წლიდან იმართება და იგი ცენტრალურ და აღმოსავლეთ ევროპაში წამყვანი იტალიური ფესტივალია.