სულ რამდენიმე წუთის წინ, 8 ოქტომბერს სპეციალურმა კომისიამ ფარული კენჭისყრით გამოავლინა ფილმი, რომელიც ოსკარების 2021 წლის დაჯილდოებაზე საქართველოს სახელით იბრძოლებს: დეა კულუმბეგაშვილის დასაწყისი.

ამერიკის კინოაკადემიის ნომინაციისთვის საუკეთესო საერთაშორისო სრულმეტრაჟიანი ფილმი (შარშანდლამდე ამ ნომინაციას საუკეთესო უცხოენოვანი ფილმი ეწოდებოდა) საქართველოს ეროვნული კინოცენტრი პირველი სექტემბრიდან არჩევდა კანდიდატებს. მათგან წლევანდელ ფინალისტებს შორის მოხვდა უტა ბერიას უარყოფითი რიცხვები, ოთარ შამათავას ურსუსი და დეა კულუმბეგაშვილის დასაწყისი.

დეა კულუმბეგაშვილი ახალგაზრდა ქართველი რეჟისორია, რომლის სადებიუტო სრულმეტრაჟიანი ფილმი დასაწყისი სან-სებასტიანის საერთაშორისო კინოფესტივალზე ტრიუმფატორი გახდა: ქართულმა კინოსურათმა ოთხ მთავარ კატეგორიაში გაიმარჯვა, მათ შორის საუკეთესო ფილმის ნომინაციაში.

ფილმის შესახებ აქტიურად წერენ უცხოური გამოცემები და კრიტიკოსები ქართველი რეჟისორის ნამუშევრის მისამართით საქებარ სიტყვებს არ იშურებენ, რაც მას მომავალ ოსკარებზე ფინალისტებში მოხვედრის შანსს კიდევ უფრო უზრდის.

დეა კულუმბეგაშვილი სან-სებასტიანის კინოფესტივალზე.

ფოტო: Gari Garaialde

შარშანდელ ოსკარებზე საქართველოდან გაიგზავნა დიტო ცინცაძის შინდისი, თუმცა, სამწუხაროდ, ეს კინოსურათი ფინალისტებს შორის ვერ მოხვდა.

2021 წელს ოსკარების დაჯილდოება 28 თებერვალს უნდა ჩატარებულიყო, მაგრამ პანდემიის გამო ეს თარიღი შეიცვალა და ცერემონია დაგეგმილზე ორი თვით გვიან, 25 აპრილს გაიმართება.

ასევე იხილეთ: