სან სებასტიანის საერთაშორისო კინოფესტივალზე ია სუხიტაშვილი საუკეთესო ქალ მსახიობად დასახელდა. მან ფილმ დასაწყისში შესრულებული როლისთვის ვერცხლის ნიჟარა მიიღო.

კინოფესტივალის მთავარი ჯილდო — ოქროს ნიჟარა გადაეცა დეა კულუმბეგაშვილის ფილმს დასაწყისი. საუკეთესო რეჟისორის ჯილდო გადაეცა, ასევე, დეა კულუმბეგაშვილს. საუკეთესო სცენარის ჯილდოც მას და რატი ონელს გადაეცათ.

ფილმის სიუჟეტი პროვინციულ ქალაქში ვითარდება, სადაც იეჰოვას მოწმეებს ექსტრემისტების ჯგუფი თავს დაესხა. ფილმში მთავარ როლებს ია სუხიტაშვილი, რატი ონელი, კახა კინწურაშვილი და საბა გოგიჩაიშვილი ასრულებენ.

დასაწყისი რამდენიმე თვის წინ კანის საერთაშორისო კინოფესტივალის ოფიციალურ სელექციაში მოხვდა. კორონავირუსის პანდემიის გამო, წელს კინოფესტივალი არ ჩატარდა ტრადიციული ფორმით, ოფიციალურ სელექციაში მოხვედრილი ფილმები კი მსოფლიოს წამყვან კინოფესტივალებზე გადანაწილდნენ.

ფილმის ჩრდილოეთ ამერიკული პრემიერა რამდენიმე დღის წინ შედგა ტორონტოს საერთაშორისო კინოფესტივალზე, სადაც ფილმს გადაეცა კინოკრიტიკოსთა საერთაშორისო ასოციაციაციის (FIPRESCI) ჯილდო.