"თუ შევთანხმდებით, შევალთ პარლამენტში", — განაცხადა პარლამენტში მისულმა ალეკო ელისაშვილმა. ის ქართული ოცნების ლიდერებთან შესახვედრად პარლამენტში თანაგუნდელ ლევან იოსელიანთან ერთად მივიდა.

ელისაშვილის თქმით, კარტოგრაფების გათავისუფლებამ მათსა და ქართულ ოცნებას შორის ნდობა გააღრმავა.

"მოვედით მე და ლევანი ისევ, რათა კიდევ ერთი შეხვედრა გავმართოთ. საბოლოო შეთანხმებამდე შეიძლება მივიდეთ, შეიძლება ვერ მივიდეთ. რა თქმა უნდა, გუშინდელმა ფაქტმა ძალიან კარგი ფონი შეუქმნა ამ ყველაფერს. გააღრმავა ნდობა ჩვენს და ქართულ ოცნებას შორის, ნამდვილად. ჩვენ გვინდოდა, რომ ეს ასე მომხდარიყო. ჩვენ ველოდით გუშინდელ გათავისუფლებას", — განაცხადა მან ჟურნალისტებთან.

ელისაშვილის თქმით, აქვს მოლოდინი, რომ საარჩევნო საკითხებზეც შეთანხმდებიან.

"რაც შეეხება ვისი დამსახურებაა — მოლაპარაკების პროცესის და ეს იყო კარგი ნაბიჯი ნდობისთვის. ეს იმას ნიშნავს, რომ სხვა საკითხებზეც შეგვიძლია წინ წავიწიოთ. ყოველ შემთხვევაში ამის იმედი გვაქვს. ჩვენ არავის არაფერზე არ ვევაჭრებით. ჩვენ გვაქვს ნათქვამი პოლიტპატიმრების საკითხი იყო და არის ერთჯერადი საკითხი.

დანარჩენი საკითხები, რაც შეეხება საარჩევნო კანონმდებლობას, საარჩევნო წესებს, საარჩევნო ადმინისტრაციის დაკომპლექტებას ეს არის საკითხი, რომელიც საქართველომ ვერ მოაგვარა 30 წელია და აი ახლა ამ კაბინეტში არის იმის შანსი, რომ ამ საშვილიშვილო შეთანხმებას ხელი მოვაწეროთ", — განაცხადა მან.

პარტია მოქალაქეების ლიდერები არჩილ თალაკვაძესა და მამუკა მდინარაძეს აქამდეც შეხვდნენ. ელისაშვილის განმარტებით, მათ სურდათ გაერკვიათ, აპირებდა თუ არა მმართველი პარტია კომპრომისზე წასვლას ოპოზიციასთან მოლაპარაკებებისას. მისი თქმით, დეტალურად განიხილეს ოთხივე პუნქტი, რასაც ჯერ კიდევ ფასილიტატორ ელჩებთან მოლაპარაკებებისას ითხოვდნენ. მაშინ მამუკა მდინარაძემ განაცხადა, რომ საბოლოოდ, ქართულ ოცნებასა და მოქალაქებს შორის შეთანხმება შედგება. თუმცა, მანვე აღნიშნა, რომ შეხვედრის დროს მოქალაქეების ლიდერებს პოლიტპატიმრებზე არ ესაუბრნენ.

გუშინ, 28 იანვარს, კარტოგრაფების გირაოს სანაცვლოდ გათავისუფლების შემდეგ, ელისაშვილმა განაცხადა, რომ ეს ყველაფერს ცვლის, რადგან მათთვის ერთ-ერთი მთავარი მოთხოვნა იყო პარლამენტში შესასვლელად. მისივე თქმით, ხვალ პარლამენტში არ შევა, რადგან საარჩევნო საკითხები ჯერ კიდევ არ არის შეცვლილი.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.