ევროპული საქართველოს ერთ-ერთი ლიდერის, სერგი კაპანაძის განცხადებით, მნიშვნელოვანია, რომ სტრასბურგის სასამართლოს გადაწყვეტილებას საქართველოს ხელისუფლების მხრიდან კონკრეტული ნაბიჯები მოჰყვეს. კერძოდ, ის სვამს კითხვას, აპირებს თუ არა ქართული ოცნება, საქართველოს დავა რუსეთის წინააღმდეგ მარლთმსაჯულების სასამართლოში დააბრუნოს. ის, ასევე, მთავრობას სთხოვს განმარტოს, რატომ არ იყო გამოყენებული კონკრეტული მექანიზმები მთელი ეს პერიოდი, რომლებზეც სასამართლომ სახელმწიფოს მიუთითა და ახლა რამდენად შეუქმნა ამ შეწყვეტილმა პროცესმა პრობლემა მარლთმსაჯულების სასამართლოში დავის დაბრუნების საკითხს.

"ეს გადაწყვეტილება იძლევა შესაძლებლობას, რომ იქნას გააქტიურებული რუსეთის წინააღმდეგ სანქციების თემა სხვადასხვა საერთაშორისო ორგანიზაციაში, მათ შორის ევროსაბჭოს ფარგლებში, საპარლამენტი ასამბლეის ფარგლებში გააქტიურებული იქნას ადრე მიღებული რეზოლუციები, რომლებიც სწორედ ამ საკითხს ეხება და ყველაზე მნიშვნელოვანი, რომელზეც ცალკე მინდა აქცენტი გავაკეთო, ეს არის საქართველო-რუსეთის დავა გაეროს მარლთმსაჯულების სასამართლოში", — განაცხადა კაპანაძემ.

მისივე თქმით, ძალიან მცირე დროა დარჩენილი იმისათვის, რომ საკითხი მარლთმსაჯულების სასამართლოს უკან დაუბრუნდეს.

"ასევე, კონკრეტული ახსნა უნდა მოვისმინოთ იმასთან დაკავშირებით, ეს პერიოდი რატომ არაფერი არ გააკეთეს, რატომ არ გამოიყენეს კონკრეტულად არსებული მექანიზმები, რომლებზეც მაშინ სასამართლომ მიგვითითა, რატომ შეწყვიტეს დიალოგი დევნილების დაბრუნებასთან დაკავშირებით და ახლა, რამდენად შეუქმნა ამ შეწყვეტილმა პროცესმა პრობლემა მარლთმსაჯულების სასამართლოს დაბრუნების საკითხს", — აცხადებს სერგი კაპანაძე.

ადამიანის უფლებათა ევროპული სასამართლოს გადაწყვეტილება აგვისტოს ომის საქმეზე 21 იანვარს გამოაცხადა. დიდმა პალატამ რუსეთის წინააღმდეგ საქართველოს ყველა ძირითადი სარჩელი დააკმაყოფილა.

კერძოდ, სტრასბურგის სასამართლო გაიზიარა საქართველოს პოზიცია და ქართველი სამხედრო ტყვეებისა და სამოქალაქო პირების მიმართ ჩადენილი წამების, არაადამიანური და ღირსების შემლახველი მოპყრობისთვის (კონვენციის მე-3 მუხლი) რუსეთი დაადანაშაულა.

სასამართლოს დიდმა პალატამ, კონვენციის მე-4 მუხლის შესაბამისად, რაც სიცოცხლის უფლებას გულისხმობს, ომის დროს საქართველოს მოქალაქეთა მკვლელობების გამოუძიებლობისთვის რუსეთის პასუხისმგებლობა დაადგინა.

აღნიშნული გადაწყვეტილება 17 მოსამართლისგან შემდგარმა სასამართლოს დიდმა პალატამ მიიღო, რომელიც არ საჩივრდება.

აგვისტოს ომის საქმეზე საქართველო რუსეთს ევროპული კონვენციის 8 მუხლის დარღვევაში ადანაშაულებდა. კერძოდ, საქართველო მიიჩნევს, რომ რუსეთმა ომისა და შემდგომი ოკუპაციის დროს დაარღვია ევროპული კონვენციის შემდეგი მუხლები:

• სიცოცხლის უფლება;
• წამების, არაადამიანური ან ღირსების შემლახველი მოპყრობის ან დასჯის აკრძალვა;
• თავისუფლებისა და უსაფრთხოების უფლება;
• პირადი და ოჯახური ცხოვრების დაცულობის უფლება;
• სამართლებრივი დაცვის ქმედითი საშუალების უფლება;
• საკუთრების დაცვა;
• განათლების უფლება;
• მიმოსვლის თავისუფლება.