სოფელ ბუკნარში დასრულდა შეხვედრა, სადაც მოსახლეობა რელიგიურ ნიადაგზე გაჩენილი კონფლიქტის მოგვარებაზე შეთანხმდა. სოფლის მაცხოვრებლებმა თავიანთი პოზიციები გააჟღერეს.

"დღეს ჩვენ შორის პოლიცია დგას. ჩემთვის ყველაზე დიდი სირცხვილი დღეს ესაა", — განაცხადა კაცმა, რომელიც მუსლიმი თემის წარმომადგენელა. სიტყვით გამოსვლისას მან აღნიშნა, რომ ზოგიერთმა მისი ქართველობა ეჭვის ქვეშ დააყენა.

"ქალბატონ მარიკას, ჩემს მასწავლებელს თვალებში ვერ ვუყურებ იმის გამო, რომ თურმე ათი წელი მარიკა მასწავლებელმა, მაპატიე ამას რომ ვამბობ, ტყუილით მაცხოვრა, რომ მე ქართველი არ ვიყავი. არ მინდა დავასახელო ის პირები, ვინც ჩემი ქართველობა ეჭვქვეშ დააყენა.

მე მინდა მარიკა მასწავლებელს ვკითხო, თუ ქართველი არ ვიყავი, ვეფხისტყაოსანს რატომ მიკითხავდი და რატომ მაზეპირებინებდი. ყველამ თავის გულში ჩაიხედოს და თუ ჩემი ქართველობა ეჭვქვეშ დგას და ვიღაცას თავისი მემატიანე ჰყავს... გიგი კუტუბიძემ, შორენა სირაძემ და მარიკამ მე სხვა ისტორია მასწავლეს და თქვენ თუ სხვა იცით, მითხარით, ბატონო.

აჭარა სამასი წელი იყო და ქართველობა რელიგიის სანაცვლოდ შეგვინახეს და აქამდე მოვედით ქართველებად, ხო? ამ დროს კაცი, რომელიც მეუბნება, რომ ჩემი წინაპარი ქართველი იყო და შენი წინაპარი ქართველი არ იყოო. ჩვენი რვაჯერ აჯანყებული და გადაშენებული აჭარა რომ არის ხომ იცით? ჩვენ რომ თურქებს ვებრძოდით, ერეკლე მეფეც ებრძოდა.

მე რომ მარიკა მასწავლებელმა სკოლიდან გამომიშვა, ქართული პიესა დავდგით აქ, მთავარ როლში მე ვიყავი. მაშინ არ ვიყავი თათარი, მაშინ არ ვიყავი არაქართველი?" — აღნიშნა ბუკნარის მაცხოვრებელმა კაცმა.

მუსლიმებსა და მართლმადიდებლებს შორის რელიგიურ ნიადაგზე კონფლიქტი 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

პრემიერმინისტრი გიორგი გახარია აცხადებს, რომ მოქალაქეებს შორის რელიგიურ ნიადაგზე დაპირისპირების პროვოცირების საშუალებას სახელმწიფო არავის მისცემს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიამ სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

EMC-ში აცხადებენ, რომ მომხდარ ინციდენტში 2 ძირითადი სამართლებრივი საკითხი იკვეთება — ძალადობის შემთხვევა დაზარალებული მუსლიმი პირების მიმართ, რომელიც დროულ და ეფექტიან სამართლებრივ რეაგირებას ითხოვს და სალოცავი სივრცის ფუნქციონირებისთვის უსაფრთხო და მშვიდობიანი პირობების შექმნა.

ევანგელისტურ-ბაპტისტური ეკლესია ხელისუფლებას მოუწოდებს, არა მხოლოდ ბუკნარის, არამედ დღემდე მომხდარ ყველა ინციდენტზე გამოძიება დაუყოვნებლივ დაიწყოს. მათი განცხადებით, ქვეყანას, სადაც ახალგაზრებს ლოცვისათვის თავს უტეხავენ, მომავალი არ აქვს.

შინაგან საქმეთა სამინისტროს ცნობით, დააკავეს პირი, რომელმაც 12 იანვარს ბუკნარში ორ თანასოფლელს ქვის გამოყენებით თავის არეში დაზიანებები მიაყენა. მათივე განცხადებით, გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს და 6 თვიდან 1 წლამდე ვადით თავისუფლების აღკვეთას ითვალისწინებს.

გაიგეთ მეტი: