ჩოხატაურის სოფელ ბუკნარში პოლიციასა და მუსლიმ თემს შორის ცოტა ხნის წინ დაპირისპირება იყო. მუსლიმი მოქალაქეები სამლოცველოს მოწყობას ითხოვენ, რასაც ადგილობრივი ქრისტიანები ეწინააღმდეგებიან.

ფორმულას ინფორმაციით, მუსლიმი თემის წარმომადგენლებმა პოლიციის ცოცხალი ჯაჭვი გაარღვიეს და სოფლის ცენტრში გადაინაცვლეს. სოფლის ცენტრში, ასევე, დღის პირველ ნახევარში, ქრისტიანი თემის წარმომადგენლები იყვნენ შეკრებილნი, რომლებიც სამლოცველოს მოწყობას ეწინააღმდეგებიან. ამიტომ პოლიცია მუსლიმ მოქალაქეებს გადაადგილების საშუალებას არ აძლევდა, რასაც დაპირისპირება მოჰყვა.

"არ გვინდა დაპირისპირება. ძალიან ცუდი სიტუაციაა. ეს არ შეგვეფერება. თუ შესაბამის განწყობაზე არ დაგვაყენებს მთავრობა, ამ სოფელში ძალიან ცუდად დამთავრდება ყველაფერი. უნდა ირწმუნონ ჩვენმა თანამოქალაქეებმა, რომ ჩვენ ვილოცებთ. კონსტიტუციის მიხედვით ხომ გვაქვს ამის უფლება, რამეს ვითხოვთ უკანონოს? წლების წინ თუ ჩვენი მამა-პაპები ლოცულობდნენ ამ მიწაზე, ახლა რაღა მოხდა?", — ამბობს აქციის ერთ-ერთი მონაწილე ფორმულასთან.

გურიის გუბერნატორის, ზურაბ ნარსიას თქმით, ვითარების დასარეგულირებლად ყველაფერს აკეთებენ.

"თქვენი წარმომადგენლები დღეს ჩემთან იყვნენ მოსულნი. ჩვენ ძალიან მშვიდ ვითარებაში დავილაპარაკეთ და გასაგები ენით ავხსენით ვითარებაც და გამოსავალიც. თქვენ თქვენს მეზობლებთან როგორც ცხოვრობდით ტკბილად და ლამაზად, ესე გააგრძელეთ ეს ყველაფერი, როგორც ლოცულობდით, როგორც იკრიბებოდით ერთმანეთთან, ჩვეულებრივად ამ რეჟიმზე უნდა დავბრუნდეთ. იმ მხარესაც უნდა ავუხსნათ, მე პირადად და ყველა თქვენგანმა, რომ ჩვენ ძმები ვართ, ერთად ვცხოვრობდით, ვართ ქართველები. მგონი, გასაყოფი არაფერი გვაქვს", — განუცხადა აქციის მონაწილეებს ზურაბ ნასარიამ.

ფორმულას ინფორმაციით, სოლიდარობის გამოსაცხადებლად მხარდამჭერები, მუსლიმი თემის წარმომადგენლები სხვადასხვა რეგიონიდანაც შეიკრიბნენ.

რელიგიურ ნიადაგზე დაწყებული კონფლიქტი მუსლიმებსა და მართლმადიდებლებს შორის გუშინ, 12 იანვარს დაიწყო. ადამიანის უფლებების სწავლებისა და მონიტორინგის ცენტრის (EMC) ინფორმაციით, ბუკნარში მეზობლებს შორის მომხდარი ურთიერთშელაპარაკების დროს მძიმე ფიზიკური დაზიანებები მიაყენეს სამ მუსლიმს, მათ შორის მუსლიმ ბავშვებს. დაშავებულები კი მიღებული არაერთი დაზიანებით საავადმყოფოში გადაიყვანეს.

ბუკნარში მომხდარ დაპირისპირებას გამოეხმაურა სახალხო დამცველი. ნინო ლომჯარიას სოფელში განვითარებულ მოვლენებს სამწუხარო ფაქტი უწოდა და აღნიშნა, რომ მსგავსი შემთხვევა პირველი არ არის, სახელმწიფოს კი თითოეული მოქალაქის ლოცვის უფლების დაცვისკენ მოუწოდა.

EMC-ში აცხადებენ, რომ მომხდარ ინციდენტში 2 ძირითადი სამართლებრივი საკითხი იკვეთება — ძალადობის შემთხვევა დაზარალებული მუსლიმი პირების მიმართ, რომელიც დროულ და ეფექტიან სამართლებრივ რეაგირებას ითხოვს და სალოცავი სივრცის ფუნქციონირებისთვის უსაფრთხო და მშვიდობიანი პირობების შექმნა.

ევანგელისტურ-ბაპტისტური ეკლესია ხელისუფლებას მოუწოდებს, არა მხოლოდ ბუკნარის, არამედ დღემდე მომხდარ ყველა ინციდენტზე გამოძიება დაუყოვნებლივ დაიწყოს. მათი განცხადებით, ქვეყანას, სადაც ახალგაზრებს ლოცვისათვის თავს უტეხავენ, მომავალი არ აქვს.

შინაგან საქმეთა სამინისტროს ცნობით, დააკავეს პირი, რომელმაც 12 იანვარს ბუკნარში ორ თანასოფლელს ქვის გამოყენებით თავის არეში დაზიანებები მიაყენა. მათივე ცნობით, გამოძიება საქართველოს სისხლის სამართლის კოდექსის 126-ე მუხლის 1-ლი ნაწილით მიმდინარეობს, რაც ცემას ან სხვაგვარ ძალადობას გულისხმობს და 6 თვიდან 1 წლამდე ვადით თავისუფლების აღკვეთას ითვალისწინებს.