ადამიანის უფლებათა ევროპულ სასამართლოში საქართველოს მხრიდან წარდგენილი მოსამართლეობის კანდიდატების სიის ჩავარდნის შესაძლო მიზეზებთან დაკავშირებით, იუსტიციის უმაღლესი საბჭოს წევრი ევა გოცირიძე წერილს აქვეყნებს:

"ჩემთვის არ არის ცნობილი, გამოითქვა თუ არა რაიმე პრეტენზია უშუალოდ ჩემს კვალიფიკაციასთან დაკავშირებით კომიტეტში. გასაუბრების დროს კომიტეტის წევრთა რეაქციის მიხედვით მე არ დამრჩენია ისეთი შთაბეჭდილება, რომ ეს ჩემთვის მოსალოდნელი ყოფილიყო. უფრო მეტიც, კომიტეტის ბრიტანელმა წევრმა ისიც კი მკითხა, თუ როგორ მოხდა, რომ ასეთი შთამბეჭდავი (მან სწორედ ეს სიტყვა გამოიყენა - impressive) გამოცდილებისა და კვალიფიკაციის მქონე, თავიდანვე არ მოვხვდი სიაში (იგულისხმა კანდიდატთა პირველი სია საქართველოდან წარდგენილი)".

როგორც ევა გოცირიძე წერს, მისი კანდიდატურა გარკვეული პირების, ნაციონალური მოძრაობის, არასამთავრობო სექტორის, სახალხო დამცველისა და ადვოკატთა ასოციაციის ჩარევის შედეგად არ შეირჩა:

"განხორციელდა ძალთა არნახული მობილიზაცია ჩემი კანდიდატურის წინააღმდეგ მთელი არასამთავრობო სექტორისა და ნაციონალური მოძრაობის მხრიდან - არასამთავრობო ორგანიზაციათა კოალიციამ, ადვოკატთა ასოციაციის თავმჯდომარემ, ევროსაბჭოში საქართველოს ყოფილმა წარმომადგენელმა, როგორც ჩანს, ერთი საერთო მიზნით შთაგონებულებმა, წერილები აფრინეს ჩემს წინააღმდეგ ხსენებულ კომიტეტში. თვით სახალხო დამცველმაც არ ითაკილა ბევრი აუგის თქმა ჩემი მისამართით ევროსაბჭოს მაღალი თანამდებობის პირებთან. როგორც არ უნდა გაიკვირვოს ბატონმა უჩამ, ეს ამბავი მეც შევიტყვე სრულიად სხვა წყაროებიდან."

ევა გოცირიძის განცხადებით, კანდიდატთა შერჩევის პროცესი პოლიტიკური ბრძოლის არენად გადაიქცა. მისივე თქმით, ეს პროცესი შეიძლება უკავშირდებოდეს მერაბიშვილის საქმესაც:

"ეს შეიძლება მართლაც უკავშირდებოდეს მერაბიშვილის საქმის განხილვას სტრასბურგში, რომელიც მარტის თვეშია ჩანიშნული და სხვა მომავალ საქმეებს. თორემ, განა შეიძლება იმის უარყოფა, რომ სტრასბურგის მოსამართლის შერჩევა პირველად მოხდა კონკურსის გზით, სამოქალაქო სექტორის ფართო ჩართულობით, ქულობრივი შეფასების საფუძველზე. მაშინ როდესაც წინა არჩევნებზე მოსამართლეობის კანდიდატთა სია ყოველგვარი პროცედურების გაუვლელად მაშინდელი პრეზიდენტის ნება-სურვილის მიხედვით შეარჩიეს და არც სტრასბურგს მიუჩნევია ინტერესთა კონფლიქტად ასეთ პირობებში გენერალური პროკურორის (ზურა ადეიშვილის) მოადგილის კანდიდატურის წამოყენება. არავის გვახსოვს მაშინ უფლებადამცველ ბატონ უჩას და საერთოდ, არასამთავრობო სექტორს, ეს თუნდაც მორიდებით გაეპროტესტებინოს".

ევროსაბჭოში 24 იანვარს გამართულ შეხვედრაზე საქართველოდან მოსამართლეები უნდა დაემტკიცებინათ, თუმცა, პროცესი ჩაიშალა, რის გამოც საქართველოს ხელისუფლებამ კონკურსი ხელახლა უნდა ჩაატაროს და ევროსაბჭოს ახალი სია წარუდგინოს.

ევროსასამართლოს მოსამართლეობის კანდიდატები იყვნენ ევა გოცირიძე, ალექსანდრე ბარამიძე და გიორგი ბადაშვილი. ევა გოცირიძე 2013 წლიდან იუსტიციის უმაღლესი საბჭოს წევრია.