თუ სულ გინდოდა მეგობრისთვის დაბადების დღე შენ მაგივრად ცნობილ ქართველს მიელოცა და ამაში ფული გადაგეხადა, ამიერიდან შეგიძლია 2020 წელი სურვილების ასრულების წლად მოიხსენიო.

საქართველოში ამერიკული Cameo-ს მსგავსი ვებგვერდი შეიქმნა, რომლის საშუალებითაც, შეგიძლია ქართველ "სელებრითებს" ფული გადაუხადო, აალაპარაკო და 1-დან 2 წუთამდე ხანგრძლივობის ვიდეოც ჩააწერინო.

"შეუკვეთე ვიდეო ცნობილ ადამიანს ნებისმიერი მოვლენის აღსანიშნავად #დაბადებისდღე #ქორწილი #ხელისთხოვნა #კითხვა #რჩევა", — ვკითხულობთ Celeb.ge-ზე.

საიტზე ქართველი ცნობილი სახეები უკვე დარეგისტრირდნენ. მაგალითად, უკვე შეგიძლია 99-ლარიანი რჩევა ან მილოცვა მიიღო ისეთი ვარსკვლავისგან, როგორიცაა ნინი ბადურაშვილი, ნოდიკო ტატიშვილი, ლექს-სენი, ჯულიეტა ბარ გნარი და ა.შ. Celeb.ge-ზე ამ დროისთვის 40-მდე ცნობილი სახეა დარეგისტრირებული ტელევიზიის, თეატრის, კინოს, მუსიკის, ხელოვნების, მოდის და სპორტის კატეგორიებიდან.

ფოტო: Celeb.ge

ეს ყველაფერი არაა, ქართველ "სელებრითებს" შორის სანტა-კლაუსსაც შეხვდები, რომელსაც ერთი მილოცვა უკვე ჩაწერილი აქვს. სანტასგან პერსონალური მილოცვის მიღება ფასდაკლებით, 68 ლარად, შეგიძლია.

"როგორც წესი, სანტა მოთხოვნილ მილოცვას 48 საათში აგზავნის, მაგრამ, ვინაიდან ის ძალიან დაკავებულია, უფლებას იტოვებს ზოგიერთ შემთხვევაში ვიდეო 7 დღეში გამოაგზავნოს", — ვკითხულობთ საიტზე.

გადაღებულ ვიდეოს Celeb.ge მითითებულ ელექტრონულ ფოსტაზე გამოგიგზავნის. საიტზე ვკითხულობთ, რომ თუ შეკვეთა ვერ შესრულდება, გადახდილი თანხა უკან დაგიბრუნდება.

Cameo ამერიკული ვიდეოების გასაზიარებელი ვებგვერდია, რომლის სათაო ოფისიც ჩიკაგოში მდებარეობს. ის 2016 წელს შეიქმნა და მისი მიზანი ვარსკვლავებისგან მომხმარებლებისთვის პერსონალური მესიჯების გაგზავნაა. ვებგვერდზე ამ დროისთვის 30 ათასზე მეტი "სელებრითია" დარეგისტრირებული.