ადამიანის უფლებათა ევროპულმა სასამართლომ, 2016 წელს, ევროპის საბჭოს წევრი თითოეული ქვეყნის წინააღმდეგ, საერთო ჯამში 993 საქმეზე გამოიტანა განაჩენი. აქედან 829 (83,5%) საქმეში ადამიანის უფლებათა ევროპული კონვენციის, სულ მცირე, ერთი დარღვევა დადგინდა.

წინა წლის მსგავსად, საქართველოს წინააღდეგ წარმოებულ საქმეებზე, გასულ წელს, მხოლოდ 4 გადაწყვეტილება იქნა გამოტანილი. ევროპულმა სასამართლომ საქართველო არც ერთ შემთხვევაში არ გაამართლა. კერძოდ, საქართველოს სახელმწიფომ დაარღვია:

  • თავისუფლებისა და ხელშეუხებლობის უფლება;
  • სამართლიანი სასამართლო განხილვის უფლება;
  • პირადი და ოჯახური ცხოვრების პატივისცემის უფლება.

ევროპული სასამართლოს ისტორიაში, 1959- დან 2016 წლამდე საქართველოს წინააღმდეგ წარმოებულ დავებზე, საერთო ჯამში, 68 გადაწყვეტილება იქნა გამოტანილი. აქედან 52 შემთხვევაში ადამიანის უფლებათა კონვენციის პრინციპების დარღვევა დადგინდა.

სასამართლოს ცნობით, ყველაზე მეტჯერ საქართველომ თავისუფლებისა და ხელშეუხებლობის უფლება დაარღვია. ათეულის სტატისტიკა კი ასეთია:

  1. თავისუფლებისა და ხელშეუხებლობის უფლება - 20;
  2. არაადამიანური და შეურაცხმყოფელი მოპყრობა - 17;
  3. სამართლიანი სასამართლო განხილვის უფლება - 12;
  4. ეფექტიანი გამოძიების დეფექტი - 9;
  5. დისკრიმინაციის აკრძალვა - 6;
  6. საკუთრების დაცვა - 6;
  7. პირადი და ოჯახური ცხოვრების პატივისცემის უფლება - 5;
  8. საქმის განხილვა და მორიგების პროცედურა - 5;
  9. სამართლებრივი დაცვის ეფექტიანი საშუალების უფლება - 4;
  10. ეფექტიანი გამოძიების ნაკლებობა - 3.

2016 წლის ბოლოსთვის საქართველოს წინააღდეგ 2 077 საჩივარი ელოდება განხილვას. წინა წელს კი ეს მაჩვენებელი 2 154 იყო.

დარღვევების ყველაზე მაღალი მაჩვენებელი, 2016 წელს, რუსეთს დაუდგინდა. ევროპულმა სასამართლომ რუსეთის წინააღმდეგ წარმოებულ 228 საქმიდან 222-ში გამამტყუნებელი განაჩენი გამოიტანა. მას მოჰყვება თურქეთი (77), რუმინეთი (71), უკრაინა (70), საბერძნეთი (41) და უნგრეთი (40).