პრეზიდენტმა სასამართლო რეფორმების შესახებ კანონპროექტი პარლამენტს შენიშვნებით დღეს, 25 იანვარს დაუბრუნა. ამის შესახებ ინფორმაცია პრეზიდენტის ადმინისტრაციის ვებგვერდზეა განთავსებული.

საქართველოს პრეზიდენტს, გიორგი მარგველაშვილს მიაჩნია, რომ სასამართლოების შესახებ კანონში შესატანი ცვლილებები, რომელიც პარლამენტმა 10 იანვარს მას გადაუგზავნა ეწინააღმდეგება მიუკერძოებელი სასამართლოს პრინციპებს.

გარდა ამისა, მას მიაჩნია, რომ სასამართლო რეფორმის პაკეტი ეწინააღმდეგება ინდივიდუალური მოსამართლის დამოუკიდებლობის უზრუნველყოფის პროცესებს. შენიშვნებიდან გამომდინარე, მან გადაწყვიტა კონსტიტუციური უფლების გამოყენება და პარლამენტს მოტივირებული შენიშვნებით კანონპროექტის დაბრუნება.

"უმნიშვნელოვანესია ის ცვლილებები, რომელებიც უზრუნველყოფს სასამართლოში თავმჯდომარეობის არჩევის წესს და აუქმებს მომავალში საგამოცდო ვადას. ეს ის ძირითადი პრინციპებია, რომელიც სრულიად თანხვედრაშია ვენეციის კომისიის უკვე გაკეთებულ რეკომენდაციებთან," - განმარტა მარგველაშვილმა.