გამარჯვებული საქართველოს ლიდერი, ირაკლი ოქრუაშვილი ამბობს, რომ იმ ოპოზიციონერ ლიდერებს, რომლებსაც აქამდე მაღალ თანამდებობებზე არ უმუშავიათ, მეტი ცდუნება აქვთ, შევიდნენ პარლამენტში. TV პირველის ეთერში ოქრუაშვილმა განაცხადა, რომ ოპოზიციონერი ლიდერების ნაწილი მთელი ცხოვრება ოცნებობდა პარლამენტარობაზე და როცა "უცბად თავზე დაეცათ ეს სტატუსი" ბუნებრივია, რომ უარს ვერ ამბობენ.

"ჩემ ბავშვობაში სანზონაში თუ თემქაზე იყო ერთ-ერთი პიროვნება, რომელსაც მთელი ცხოვრება კანონიერი ქურდობა უნდოდა და ბოლოს მიაღწია ამ კანონიერი ქურდობას. იმდენად დაუჯერებელი იყო მისთვის, რომ იქ შეკრებილებს, ვინც ეს მონათვლის რიტუალი ჩაატარა, იმ ადამიანებს უთხრა, რომ არ მჯერა ქურდი რომ გავხდიო და იქვე, მაშინვე მოუთავეს საკითხი და ეგრევე გააჩერეს, ჩამოართვეს სტატუსი. ეს ადამიანებიც ამას გვანან დაახლოებით.

ოპოზიცია ძალიან მრავალფეროვანია: ბევრი ვართ ყოფილი თანამდებობის პირები. მინისტრებადაც გვიმუშავია, დეპუტატებიც ვყოფილვართ, ზოგი გუბერნატორი იყო და არის კიდევ მეორე კატეგორია, რომლებიც მთელი ცხოვრება ოცნებობდნენ და ვერ წარმოიდგენდნენ რომ პარლამენტის წევრები გახდებოდნენ და ახლა მათთვის ცდუნება მაღალია, რა თქმა უნდა. უცბად თავზე დაეცათ ეს სტატუსი. ამ კანონიერ ქურდს გვანან დაახლოებით ესენი", — განაცხადა ირაკლი ოქრუაშვილმა.

პარტია მოქალაქეების ლიდერმა, ალეკო ელისაშვილმა დღეს განაცხადა, რომ საარჩევნო კანონმდებლობისა და საარჩევნო ადმინისტრაციების რეფორმებზე შეთანხმების შემთხვევაში პარლამენტში შევა.

გუშინ, ირაკლი ოქრუაშვილმა საკუთარ ფეისბუქ გვერდზე დაწერა, რომ ბოიკოტის მიუხედავად, ოპოზიციონერი დეპუტატების ნაწილი, მაინც შევა პარლამენტში.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებედნენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვდა ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.

მე-10 მოწვევის პარლამენტის პირველი სხდომის მოახლოებასთან ერთად, მხარების განწყობები იცვლებოდა.

გაიგეთ მეტი: