მთელ მსოფლიოში შოტლანდია პირველი ქვეყანა გახდა, რომელიც თავისი მოსახლეობისთვის ქალის ჰიგიენურ საშუალებებს უფასოდ ხელმისაწვდომს გახდის.

ამის შესახებ კანონი საბოლოოდ გუშინ, 24 ნოემბერს დამტკიცდა. The Guardian-ის ინფორმაციით, ეს გადაწყვეტილება ითვალისწინებს ვალდებულებას, რომ ადგილობრივმა ხელისუფლებამ ისეთი საჯარო სივრცეები, როგორებიცაა სპეციალური დანიშნულების საზოგადოებრივი ცენტრები, ახალგაზრდების თავშეყრის ადგილები თუ აფთიაქები, ტამპონებითა და საფენებით უფასოდ მოამარაგოს, რათა ისინი ხელმისაწვდომი იყოს ყველა მსურველისთვის.

BBC-ის ცნობით, ამ კანონპროექტის ინიციატორი შოტლანდიის ლეიბორისტული პარტიის წევრი მონიკა ლენონია, რომელიც 2016 წლიდან აქტიურ კამპანიას ეწევა, რათა ქვეყანაში ე.წ. მენსტრუალური სიღარიბე (Period Poverty) შემცირდეს. ტერმინით "მენსტრუალური სიღარიბე" აღნიშნავენ ქალების იმ მდგომარეობას, როცა მათ დაბალი შემოსავლების გამო ხელი არ მიუწვდებათ აუცილებელ ჰიგიენურ საშუალებებზე.

"ეს გადაწყვეტილება მნიშვნელოვან გავლენას იქონიებს ქალების, გოგოებისა და იმათ ჯანმრთელობაზე, ვისაც მენსტრუაცია აქვს. საზოგადოებრივ დონეზე უკვე მნიშვნელოვანი წინსვლა გვაქვს და ხელისუფლების ეს გადაწყვეტილება მათ კიდევ უფრო ღირსეული ცხოვრების შესაძლებლობას მისცემს", — განაცხადა ლენონმა.

მონიკა ლენონი

ფოტო: Andrew Milligan/PA

"მენსტრუალური სიღარიბე" — ყოველთვიურად საჭირო სანიტარული ნივთებისთვის საჭირო ფინანსების არარსებობა — ერთ-ერთი მწვავე საკითხია, რომელზეც ბოლო პერიოდში ქალთა უფლებადამცველები აქტიურად საუბრობენ: შოტლანდიაში ჩატარებული კვლევის მიხედვით, ყოველ მეხუთე ქალს ერთხელ მაინც გამოუცდია ეს პრობლემა, რაც მის ჰიგიენაზე, ჯანმრთელობასა და კეთილდღეობაზე უარყოფითად აისახა. ამავე ქვეყნის მაგალითზე ქალებს საჭირო ჰიგიენური ნივთების შესაძენად თვეში 13 გირვანქა სტერლინგის დახარჯვა უწევთ (დაახლოებით 60 ლარი), სიცოცხლის განმავლობაში კი ეს ხარჯები ათასობით დოლარს აღწევს.

კიდევ ერთი კვლევა აჩვენებს, რომ დიდ ბრიტანეთში გოგოების 10%-ს შესაძლებლობა არ აქვს, ამ ხარჯებს გასწვდეს, 15% მხოლოდ დიდი ძალისხმევის შემდეგ ახერხებს მათ შეძენას, 19%-ს კი საფენების ჩანაცვლება სხვა უფრო იაფფასიანი საშუალებებით უწევს.

აღსანიშნავია, რომ ამ პრობლემის აღმოსაფხვრელად ახალ კანონპროექტს შოტლანდიის მთავრობამ ჯერ კიდევ ამ წლის დასაწყისში დაუჭირა მხარი, შემდეგი მოსმენებით, საზოგადოებრივი განხილვებითა და კანონში შეტანილი ცვლილებებით კი 24 ნოემბრიდან ეს გადწყვეტილება ძალაშიც შევიდა.