ტოლერანტობის და მრავალფეროვნების ინსტიტუტი (TDI) საპატრიარქოს მიერ შემწყნარებლობაზე "ტრადიციული რელიგიების" კონტექსტში საუბარს საგანგაშოს უწოდებს. რელიგიის თავისუფლების საკითხი იყო ამერიკის სახელმწიფო მდივან მაიკლ პომპეოს პატრიარქ ილია მეორესთან შეხვედრის მიზანი. საქართველოს საპატრიარქოს განცხადებით, შეხვედრაზე "ითქვა, რომ საქართველო და საქართველოს ეკლესია ყოველთვის იყო შემწყნარებლური ტრადიციული რელიგიების მიმართ და რომ ეს დღესაც ასეა. ამდენად, რელიგიის თავისუფლების იდეა მათთვის უცხო არ არის".

არასამთავრობო ორგანიზაციისთვის გაუგებარია, ვის გულისხმობს საპატრიარქო "ტრადიციულ რელიგიებში".

"ნათელია, რომ იგი [საპატრიარქო] შემწყნარებლობასა და რელიგიის თავისუფლებას მხოლოდ რელიგიური გაერთიანებების ერთი ნაწილის მიმართ აღიარებს. საქართველოს კანონმდებლობა არ ყოფს რელიგიურ ჯგუფებს ტრადიციულ, არატრადიციულ ან რაიმე სხვა ნიშნით განსხვავებულ გაერთიანებებად. კონსტიტუცია იცავს ყველას რწმენისა და რელიგიის თავისუფლებას, განურჩევლად მათი რელიგიური კუთვნილებისა", — აცხადებენ ორგანიზაციაში.

TDI-ში აღნიშნავენ, რომ საქართველოში შეუწყნარებლობა და დისკრიმინაცია არადომინანტური რელიგიური ჯგუფების მიმართ სისტემური პრობლემაა. ამგვარი დამოკიდებულების წყარო კი ხშირად საზოგადოება, სახელმწიფო ან თავად მართლმადიდებელი ეკლესიის წარმომადგენლები არიან.

"რელიგიური უმცირესობები დღემდე განიცდიან სისტემურ დისკრიმინაციას, ვერ ახერხებენ ისტორიული ქონების დაბრუნებას, ხელოვნური დაბრკოლებები ექმნებათ ახალი რელიგიური დანიშნულების ნაგებობების მშენებლობისას, ხშირია შეუწყნარებლობის შემთხვევები საგანმანათლებლო სივრცეში, პასუხისგებაში არ არიან მიცემული კონკრეტული პირები რელიგიური სიძულვილის საფუძველზე ჩადენილი ძალადობრივი დანაშაულების გამო და სხვა", — განმარტავენ არასამთავრობოში.

ორგანიზაციაში მიაჩნიათ, რომ ამ ფონზე, გავლენიანი რელიგიური ინსტიტუტის მიერ უმაღლესი დონის შეხვედრაზე გაკეთებულმა განცხადებამ, რომლის თანახმად, ის შემწყნარებლობას იჩენს მხოლოდ რელიგიური ჯგუფების ერთი ნაწილისადმი, შესაძლოა, შეუწყნარებლობის ახალი ტალღა წარმოშვას და ხელი შეუწყოს რელიგიური გაერთიანებების კატეგორიზაციასა და იერარქიზაციას.

"გარდა ამისა, თუკი საპატრიარქო "ტრადიციულ რელიგიებში" მაგალითად, სომეხთა სამოციქულო ან კათოლიკე ეკლესიებსაც მოიაზრებს, აქვე ისიც უნდა ითქვას, რომ სომხური და კათოლიკური ისტორიული ტაძრების ნაწილი, რომლებიც რელიგიურ გაერთიანებებს საბჭოთა ტოტალიტარულმა რეჟიმმა ჩამოართვა, საქართველოს დამოუკიდებლობის აღდგენის შემდეგ, საპატრიარქომ მიისაკუთრა. მსგავსი მაგალითები ნამდვილად ვერ გამოდგება შემწყნარებლობის ნიმუშად", — ამბობენ TDI-ში.

მათივე თქმით, გულდასაწყვეტია, რომ უმთავრესი სტრატეგიული პარტნიორის, აშშ-ს სახელმწიფო მდივანთან რელიგიის თავისუფლების თემატიკაზე გამართული შეხვედრისას, საქართველოს მართლმადიდებელი ეკლესიის საპატრიარქოს წარმომადგენლებმა, როგორც საპატრიარქოს მიერვე გავრცელებული განცხადებიდან იკვეთება, რელიგიური ჯგუფების მიმართ დისკრიმინაციულ კონტექსტში საუბარი არჩიეს.

18 ნოემბერს აშშ-ის სახელმწიფო მდივანი მაიკლ პომპეო საქართველოს მართლმადიდებელი ეკლესიის პატრიარქს, ილია II-ს შეხვდა. სახელმწიფო მდივანმა ევროპასა და ახლო აღმოსავლეთში მოგზაურობის ერთ-ერთ მთავარ საკითხად რელიგიის თავისუფლება დაასახელა.

პომპეო თბილისში 17 ნოემბერს საღამოს ჩამოფრინდა და ოფიციალური შეხვედრები 18 ნოემბერს ჰქონდა.

აშშ-ის სახელმწიფო მდივანი შეხვდა პრეზიდენტ სალომე ზურაბიშვილს, პრემიერმინისტრ გიორგი გახარიას, პატრიარქ ილია მეორესა და არასამთავრობო ორგანიზაციებს.

შეხვედრა არ გამართულა ოპოზიციასთან. რამდენიმე პარტიის წარმომადგენლები სახელმწიფო მდივანს მდუმარე აქციით დახვდნენ. ვიზიტის დასრულების შემდეგ პომპეომ თავისი წარმომადგენელი დატოვა, რომელიც ოპოზიციის წევრებს შეხვდა.

გაიგეთ მეტი პომპეოს ვიზიტზე:

• არჩევნები, დარღვევები, რეფორმები და ბოიკოტი — პომპეოს ვიზიტის შემაჯამებელი ბრიფინგი
• სასამართლო სისტემა, ე.წ. კლანი და ბიძინა ივანიშვილი — რაზე ესაუბრნენ არასამთავრობოები მაიკ პომპეოს
• ყველა შეთანხმდა, რომ გასაკეთებელი კიდევ ბევრია — აშშ-ის საელჩო პომპეოსა და NGO-ების შეხვედრაზე
• პომპეომ და პატრიარქმა განიხილეს საქართველოს როლი მსოფლიოში რელიგიის თავისუფლების მხარდაჭერის კუთხით — საელჩო
• გახარიასთან შეხვედრისას პომპეომ ყურადღება საარჩევნო და სასამართლო რეფორმების მნიშვნელობაზე გაამახვილა — საელჩო