ილიას სახელმწიფო უნივერსიტეტსა და გარემოს ეროვნულ სააგენტოს შორის ურთიერთთანამშრომლობის მემორანდუმი გაფორმდა.

მემორანდუმის ფარგლებში, ილიას სახელმწიფო უნივერსიტეტის საბუნებისმეტყველო მეცნიერებების საბაკალავრო პროგრამების სტუდენტები მონაწილეობას მიიღებენ საქართველოს მდინარეების აუზებში ჰიდრომეტეოროლოგიური საფრთხეების მოდელირებაში და შესაბამისი რუკების შედგენაში. არსებული ეპიდემიოლოგიური მდგომარეობიდან გამომდინარე, მონაცემების შეგროვებასა და რუკების შემუშავებაში სტუდენტები ეტაპობრივად ჩაერთვებიან და მათ, ქართველ სპეციალისტებთან ერთად, გაეროს განვითარების პროგრამის (UNDP) მიერ მოწვეული საერთაშორისო ექსპერტთ გუნდი უხელმძღვანელებს.

მემორანდუმს ხელი მოეწერა 10 ნოემბერს, მსოფლიო მეცნიერების დღეს, რამაც კიდევ ერთხელ ხაზი გაუსვა განათლებისა და მეცნიერების მნიშვნელობას ისეთი გლობალური გამოწვევების დაძლევაში, როგორებიცაა კლიმატის ცვლილება და პანდემია.

მემორანდუმს ხელი ილიას სახელმწიფო უნივერსიტეტის რექტორმა გიგა ზედანიამ და გარემოს ეროვნული სააგენტოს უფროსმა, ანდრო ასლანიშვილმა მოაწერა.

ონლაინ ღონისძიებაში გარემოს დაცვისა და სოფლის მეურნეობის მინისტრის მოადგილე ნინო თანდილაშვილი, გაეროს განვითარების პროგრამის (UNDP) ხელმძღვანელი ლუიზა ვინტონი, შვეიცარიის თანამშრომლობის სააგენტოს დირექტორი დანიელ მევლი, კავკასიის მთიანი რეგიონების სამეცნიერო ქსელის წარმომადგენლები და მისი სამდივნოს — მდგრადი კავკასია — აღმასრულებელი დირექტორი, ნინა შატბერაშვილი მონაწილეობდნენ.

პროექტის შესახებ

საქართველოს გარემოს დაცვისა და სოფლის მეურნეობის სამინისტროს გარემოს ეროვნული სააგენტო ჩართულია ფართომასშტაბიან პროგრამაში, რომელიც კლიმატის ცვლილებისადმი საქართველოს ადაპტაციას ემსახურება. 74 მილიონი აშშ დოლარის ღირებულების ინიციატივა გაეროს განვითარების პროგრამისა (UNDP) და საქართველოს მთავრობის თანამშრომლობით, კლიმატის მწვანე ფონდისა და საქართველოს, შვეიცარიისა და შვედეთის მთავრობების ფინანსური ხელშეწყობით ხორციელდება.

აღნიშნული პროგრამის ფარგლებში, გარემოს ეროვნული სააგენტო აფასებს კლიმატის ცვლილებით გამოწვეული კატასტროფების, კერძოდ, წყალდიდობის, მეწყერის, ღვარცოფის, წვიმის, ქარიშხლის, ზვავისა და გვალვის რისკებს. გარდა ამისა, ამზადებს მრავალმხრივი საფრთხეების რუკებსა და რისკის პროფილებს საქართველოს თერთმეტი მდინარის (ენგური, რიონი, ჭოროხი-აჭარისწყალი, სუფსა, ნატანები, ხობისწყალი, კინტრიში, ხრამი-ხცია, ალაზანი, იორი, მტკვარი) აუზებისთვის.

მონაცემების შეგროვებასა და რუკების შემუშავებაში ჩართულ სტუდენტებს უხელმძღვანელებს გაეროს განვითარების პროგრამის (UNDP) მიერ მოწვეული საერთაშორისო ექსპერტთა გუნდი. მასში შედიან მრავალმხრივი რისკების შეფასების, საფრთხის რუკების შემუშავების, ჰიდრავლიკური მოდელირების, გეოგრაფიული ინფორმაციის სისტემების (GIS), საერთაშორისო პროგნოზირებისა და ადრეული გაფრთხილების პროფესიონალები.

ილიას სახელმწიფო უნივერსიტეტი, რომელიც აქტიურად იყო ჩართული კავკასიის მთიანი რეგიონის სამეცნიერო ქსელის შექმნაში, გააგრძელებს თანამშრომლობას, როგორც ქსელთან, ასევე მის სამდივნოსთან მდგრადი კავკასია, და ხელს შეუწყობს კლიმატის ცვლილების ადაპტაციაში უნივერსიტეტების ჩართულობის მოდელის შექმნასა. ასევე, ამ მოდელის შემდგომ დანერგვას სხვა უმაღლეს საგანმანათლებლო დაწესებულებებში.