მედიის განვითარების ფონდის ფაქტების გადამოწმების პორტალ მითების დეტექტორის ცნობით, კომუნიკაციების მარეგულირებელი კომისიის გამოცემა, მედიაკრიტიკა, წინასაარჩევნო პერიოდშიც ყველაზე დიდ დროს იმ მედია საშუალებების კრიტიკას უთმობდა, რომლებიც ხელისუფლების მიმართ კრიტიკულ სარედაქციო პოზიციას ატარებენ. მათი ინფორმაციით, სახელისუფლებო სარედაქციო პოლიტიკის გამოცემები მარეგულირებლის ობიექტივში სიმბოლურად ექცეოდნენ, ხოლო ანტიდასავლური და კრემლისტური სარედაქციო პოლიტიკის პლატფორმები მათ დღის წესრიგში საერთოდ არც ფიგურირებდნენ.

მითების დეტექტორმა mediacritic.ge-ს ვებგვერდზე 2020 წლის 1 აგვისტოდან 31 ოქტომბრის ჩათვლით გამოქვეყნებული 90 სტატია გააანალიზა, საიდანაც 81 სტატია კონკრეტული მედია საშუალებების ან ოპოზიციური მედიის კრიტიკას ეთმობა. 81 სტატიიდან 76 შემთხვევაში კრიტიკის ობიექტი ხელისუფლების მიმართ არალოიალურად განწყობილი არხები არიან:

• მთავარი არხი — 62 სტატია;
• TV პირველი — 27 სტატია;
• ფორმულა — 11 სტატია.

როგორც ანგარიშში წერია, რუსთავი 2-ის მიმართ კრიტიკული 2 სტატიიდან ერთი ძირითადად 2019 წლამდე პერიოდს მოიცავს, სანამ ტელეკომპანიის შემადგენლობა და გენერალური დირექტორი შეიცვლებოდა და მას ამჟამინდელი მთავარი არხის მენეჯმენტი მართავდა.

მონიტორინგის პერიოდში იმედი მედიაკრიტიკის მასალებში 5-ჯერ არის ნახსენები, მათ შორის მხოლოდ ერთია უშუალოდ ტელეკომპანიის მასალის კრიტიკა, დანარჩენ სტატიებში კი იმედი სხვა ტელეკომპანიებთან ერთად არის მოხსენიებული, იმედის შესახებ გამოქვეყნებული 2 სტატია იმედისა და მთავარი არხის და სხვა კრიტიკული მედიის შეპირისპირებას ეძღვნება.

მითების დეტექტორის თანახმად, გარდა ამისა, 3 მასალა კონკრეტული მედიასაშუალების დასახელების გარეშეც კრიტიკულ მედიას ეხება, ხოლო, 2 მასალაში, რომლებიც მედიის წარმომადგენლების მხრიდან რეკომენდაციების უგულებელყოფასა და კომენტარებისთვის დევნას შეეხება, კონკრეტული ტელევიზიები დასახელებული არ არის, თუმცა კადრები TV პირველის გადაცემებიდან არის გამოყენებული.

მათივე ცნობით, ერთადერთი ონლაინ მედია, რომელიც მედიაკრიტიკის კრიტიკის ობიექტი გახდა რადიო თავისუფლებაა.

მითების დეტექტორის მიხედვით, მონიტორინგის პერიოდში არ გამოქვეყნებულა არც ერთი მასალა TV ობიექტივის შესახებ, რომელიც კრემლისტურ პარტია პატრიოტთა ალიანსთან დაკავშირებული მედიასაშუალებაა და რომლის სარედაქციო პოლიტიკა ხშირად ამ პარტიის პოზიციის იდენტურია.

მაგალითად, მონიტორინგის პერიოდში TV ობიექტივმა გამოაქვეყნა კონსპირაციული ფილმი, სათაურით უკრაინული თაღლითობა, იმპიჩმენტი, ბაიდენის ნაღდი ფული, მასობრივი მკვლელობა (The Ukraine Hoax: Impeachment, Biden Cash, Mass Murder).

ფილმი, რომელიც ერთდროულად პატრიოტთა ალიანსის პარტიულმა და ამ პარტიასთან დაკავშირებულმა ფეისბუქ გვერდებმა გააზიარეს, უკრაინაში მაიდნის მოვლენებში ქართველი სნაიპერების მონაწილეობის შესახებ კრემლის ცნობილ კონსპირაციას ავითარებს, რომლის შესახებაც EUvs Disinfo არაერთგზის წერდა.

მითების დეტექტორის თანახმად, მათ მიერ გავრცელებული ვიდეოს გადამოწმების შემდეგ ფეისბუქზე TV ობიექტივის მასალა ყალბად მონიშნა.

მათივე ცნობით, მედიაკრიტიკის ობიექტივში არც სხვა ანტიდასავლური და ქსენოფობიური მედია ექცევა, მაგალითად, გაზეთი ასავალ-დასავალი, რომლის ერთ-ერთი ავტორი ამავდროულად ულტრანაციონალისტური პოლიტიკური გაერთიანება ქართული მარშის სახელით 2020 წლის არჩევნებში მონაწილეობდა და რომელიც როგორც ქვემოთ მოცემულ მაგალითში ჩანს, უფლებრივ საკითხებსა და შესაბამისს კანონმდებლობას ხშირად დასავლეთის მიერ თავსმოხვეულად და ჰომოსექსუალობის "ლეგიტიმაციად" განიხილავს.

მითების დეტექტორში აღნიშნავენ, რომ არაერთი საერთაშორისო და ადგილობრივი კვლევა ცხადყოფს, რომ როგორც TV ობიექტივი, ასევე, გაზეთი ასავალ-დასავალი თურქოფობიის, ჰომოფობიის და ანტიდასავლური განწყობების გაღვივებას უწყობენ ხელს.

მედიაკრიტიკა თავის პლატფორმას, აგრეთე, უთმობს სახელისუფლებო ექსპერტებს, რომლებიც ანტიდასავლური სარედაქციო პოლიტიკის მქონე მედიებზე მედიის განვითარების ფონდის კვლევას მაკარტიზმს ადარებენ.

წინა მონიტორინგის მსგავსად, მედიაკრიტიკის პოსტები, რომლებიც ხელისუფლების მიმართ კრიტიკულად განწყობილ არხებს ეხება, ხშირად დასპონსორებულია. დასპონსორებული 18 პოსტიდან ყველა მათგანი მთავარი არხის TV პირველის ან ფორმულას კრიტიკა ეხება. აქედან ერთი მასალა — ლარის გამყარების რეცეპტი —დარეკლამებული იყო ორჯერ. 17-დან 14 სტატიაში გაკრიტიკებულია მთავარი არხი, 5-ში TV-პირველი, 1-ში ფორმულა და 1-ში იმედი მთავარ არხთან ერთად.

ფეისბუქის მონაცემებით, 5 აგვისტოდან 2 ნოემბრამდე მედიაკრიტიკას ფეისბუქში $507 დოლარი აქვს დახარჯული.