ცენტრალური საარჩევნო კომისიის თავმჯდომარე, თამარ ჟვანია იმსახურებს ჯილდოს იმ შეურაცხყოფის გამო, რასაც ის იტანს. ამის შესახებ, ირაკლი კობახიძემ ეუთო/ოდირის სადამკვირვებლო მისიის წარმომადგენლებთან შეხვედრის შემდეგ განაცხადა.

"პირველ რიგში, თამარ ჟვანიას ეკუთვნის ჯილდო იმისათვის, რომ ითმენს ამდენ შეურაცხყოფას, განსაკუთრებით არჩევნების პირველ ღამეს რაც მოხდა. თქვენ ნახეთ აბსოლუტურად უკულტურო ქცევა ნაცმოძრაობის და ევროპული საქართველოს მხრიდან. ეს იყო აბსოლუტურად მდარე ქცევა მათი მხრიდან, აქედან გამომდინარე, თამარ ჟვანია იმსახურებს არა ჩვენი პოლიტიკური პარტიების მხრიდან თანადგომას, არამედ თითოეული მოქალაქის მხრიდან ვის ინტერესებშიც არის ხმების სათანადო დაცვა", — განაცხადა კობახიძემ.

3 ნოემბერს, ცენტრალურ საარჩევნო ადმინისტრაციასთან ოპოზიციური პარტიის მხარდამჭერები მივიდნენ და თამარ ჟვანიას გადადგომასა და არჩევნების ხელახალ ჩატარებას ითხოვდნენ. სამართალდამცველებმა აქციის წარმომადგენლებს შენობაში შესვლის უფლება არ მისცეს და რკინის ბარიკადები დააყენეს. აქციის მონაწილეებმა რკინის ბარიკადებზე ქვების რტყმა და შეძახილები "თამარი ციხეში" დაიწყეს.

31 ოქტომბრის საპარლამენტო არჩევნებში ბარიერგადალახულმა რვავე ოპოზიციურმა პარტიამ მანდატებზე უარი თქვა. ისინი პარლამენტის ლეგიტიმურობას არ აღიარებენ და ამბობენ, რომ არჩევნების დღეს გაყალბების არაერთი შემთხვევა დაფიქსირდება.

პარლამენტში არ შედიან ევროპული საქართველო, ლელო, ნაციონალური მოძრაობა — ძალა ერთობაშია, მოქალაქეები, სტრატეგია აღმაშენებელი, გირჩი, ლეიბორისტული პარტია და პატრიოტთა ალიანსი.