აჭარაში მოხუცთა სახლის და გერიატრიული თავშესაფრის კორონავირუსით ინფიცირებული 28 ბენეფიციარი გამოჯანმრთელდა. ინფორმაცია ამის შესახებ აჭარის ჯანდაცვის სამინისტრომ გაავრცელა. გამოჯანმრთელებულთა შორის 11 სათნოების სახლის, ხოლო 17 გერიატრიული თავშესაფრის ბინადარია.

სამინისტროს ცნობით, ბოლო 24 საათში აჭარაში სულ 250 პაციენტი გამოჯანმრთელდა.

მათივე ინფორმაციით, აჭარაში მკურნალობას გადის 512 პაციენტი, მათგან 12 არასრულწლოვანია და 21 ორსული. რეანიმაციაში მოთავსებულია 39 პაციენტი. ბინაზე მკურნალობს 800-ზე მეტი პირი და ისინი ექიმების მეთვალყურეობის ქვეშ იმყოფებიან.

სამინისტროს ცნობით, სტაციონარულ მკურნალობას შერეული პრინციპით დაემატა ორი სამედიცინო დაწესებულება — ბათუმის სამედიცინო ცენტრი და მედცენტრი. ჯამში კორონავირუსით ინფიცირებული პაციენტებისთვის 9 სამედიცინო დაწესებულებაა მობილიზებული.

დღეს აჭარაში კორონავირუსის 190 ახალი შემთხვევა დადასტურდა, გარდაიცვალა 3 ადამიანი.