ქართული ოცნების ყოფილი დეპუტატი ალექსანდრე ერქვანია, რომელიც ჰომოფობიური განცხადებებით გამოირჩევა და ხშირად საუბრობს ქვეყანაში ეკლესიის წამყვან როლზე, აბორტის აკრძალვას მოითხოვს. მან 22 სექტემბერს პარლამენტში კანონპროექტი დაარეგისტრირა, რომელიც ორსულობის ხელოვნურად შეწყვეტის შემთხვევაში სისხლისსამართლებრივ დევნას ითვალისწინებს. მსგავსი შინაარსის მოთხოვნა მას პარლამენტის ტრიბუნიდან არაერთხელ გაუჟღერებია.

ერქვანია სურს, რომ პროექტი დაჩქარებული წესით განიხილონ. ჯანმრთელობის დაცვისა და სოციალურ საკითხთა კომიტეტზე პირველი მოსმენა 2 ოქტომბერს უნდა გაიმართოს.

საქართველოში არსებული კანონმდებლობით, აბორტი დასაშვებია 12 კვირამდე. ამ ვადაზე მეტი ხანგრძლივობის ორსულობის შემთხვევაში აბორტი ნებადართულია მხოლოდ სამედიცინო და სოციალური ჩვენებების მიხედვით, რომელთა ჩამონათვალი დგინდება მინისტრის ბრძანებით.

ერქვანიას კანონპროექტით კი, ორსულობის ნებაყოფლობითი შეწყვეტა ნებადართული ხდება მხოლოდ იმ შემთხვევაში, თუ ორსულობის გაგრძელება საფრთხეს უქმნის ქალის სიცოცხლეს. ამასთან, აბორტი უნდა მოხდეს სათანადო უფლების მქონე სამედიცინო დაწესებულებაში, სერტიფიცირებული ექიმის მიერ. სხვა ნებისმიერ შემთხვევაში, კანონპროექტის მიხედვით, იკრძალება ორსულობის ნებაყოფლობითი შეწყვეტა.

დეპუტატისგან განსხვავებით, რომელიც თავის კანონრპოექტს სიცოცხლის უფლებით ასაბუთებს, უფლებადამცველები მიიჩნევენ, რომ უსაფრთხო აბორტი ქალების ჯანმრთელობისა და უფლებების დაცვისთვის მნიშვნელოვანია.

მიიჩნევა, რომ ყოველ ადამიანს აქვს უფლება თვითონ განსაზღვროს როდის და რამდენი შვილი იყოლიოს. როგორც ჯანდაცვის მსოფლიო ორგანიზაციაში აცხადებენ, ლეგალურ, უსაფრთხო და მრავალმხრივ სამედიცინო დახმარებაზე ხელმისაწვდომობა მნიშვნელოვანია როგორც ორსულობის შეწყვეტის, ისე მას შემდეგ, რადგან ამას სექსუალური და რეპროდუქტიული ჯანმრთელობისთვის დიდი მნიშვნელობა აქვს. უსაფრთხო აბორტზე ხელმისაწვდომობა ქალებისა და გოგოების ჯანმრთელობისა და უფლებების დაცვაა.

ჯანმოს მონაცემებით, მსოფლიოში ათიდან სამი ორსულობა აბორტით სრულდება. ამასთან, აბორტების 45 პროცენტი უსაფრთხო არაა და მათი დიდი ნაწილიც განვითარებად ქვეყნებზე მოდის.

"როდესაც ქალებს არასასურველი ორსულობისას არ აქვთ ხელმისაწვდომობა უსაფრთხო აბორტზე, ისინი ხშირად არასაიმედო ხერხებს მიმართავენ", — აღნიშნავს ჯანდაცვის მსოფლიო ორგანიზაცია.

აბორტი საშიშია, თუ მას ატარებს ადამიანი, რომელსაც არ აქვს შესაბამისი ცოდნა და ტარდება ისეთ ადგილას, რომელიც მინიმალურ სამედიცინო სტანდარტებსაც ვერ აკმაყოფილებს. ამ სამედიცინო პროცედურის აკრძალვა კი, როგორც სპეციალისტები ვარაუდობენ, სწორედ ასეთი ადგილების რაოდენობის ზრდას გამოიწვევს.

"საფრთხის შემცველი აბორტი შეიძლება ჯანმრთელობისთვის საშიში აღმოჩნდეს და გარდაცვალებაც გამოიწვიოს. ამასთან ამას შეიძლება მოჰყვეს გრძელვადიანი გართულება, როგორც ფიზიკური ისე მენტალური ჯანმრთელობის კუთხით", — აღნიშნავენ ჯანდაცვის მსოფლიო ორგანიზაციაშ.

WHO-ს სტატისტიკის თანახმად, დედების სიკვდილიანობის 4,7 პროცენტიდან 13,2 პროცენტამდე შესაძლებელია საფრთხის შემცვლელ აბორტებს დაუკავშირდეს. ყოველწლიურად კი განვითარებად ქვეყნებში არასაიმედო აბორტით გამოწვეული გართულებების გამო შვიდი მილიონი ქალი საავადმყოფოში ხვდება.