ე.წ. კაბელების საქმის პროკურორი ნინო აღლემაშვილი აცხადებს, რომ პროკურატურამ სასამართლოში წარადგინა ურთიერთშემხებლური, უტყუარი მტკიცებულებები, რომელთა გამოკვლევის შემდეგ "გამამტყუნებელი განაჩენს ალტერნატივა არ ჰქონდა":

"მეორე მხრივ, დაცვის მხარის მტკიცებულებებს, გარკვეულ შემთხვევაში, საქმესთან კავშირი არ ჰქონდა და იყო აბსურდული, რასაც მოსამართლე ვერ გაიზიარებდა საქმეში. დღევანდელი გადაწყვეტილება არის ნათელი დადასტურება იმისა, რომ მართლმსაჯულების განმახორციელებელი ორგანო ქვეყანაში ადეკვატურად პასუხობს საჯარო მოხელეების მიერ საბიუჯეტო თანხების გაფლანგვას, რაც მნიშვნელოვნად აზიანებს სახელმწიფოს ინტერესებს.

ჟურნალისტებმა ნინო აღლემაშვილს ჰკითხეს, რამდენად ნორმალურია, როცა საქართველოს მთავარი პროკურორი საქმესთან დაკავშირებით აკეთებს წინასწარ მინიშნებებს, რაზედაც მან უპასუხა:

გვქონდა გამატყუნებელი განაჩენის გამოტანის იმედი. სხვა შემთხვევაში, პროკურატურა საქმეს სასამართლოში არ წაიღებდა.

პროკურორი ნინო აღლემაშვილი

"მთავარი პროკურორი არის ყველა პროკურორის ზემდგომი პროკურორი და ბუნებრივია, ის იყო ინფორმირებული საქმის მსვლელობასთან დაკავშირებით უშუალოდ პროკურორებისგან. პროკურატურას არა მხოლოდ ბოლო ეტაპზე, არამედ მას შემდეგ, რაც ჩვენ საქმე სასამართლოში წარვადგინეთ, გვქონდა გამამტყუნებელი განაჩენის გამოტანის იმედი. სხვა შემთხვევაში პროკურატურა საქმეს სასამართლოში არ წაიღებდა".

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ სცნო სახელმწიფო ბიუჯეტის კუთვნილი 4 მილიონამდე ლარის გაფლანგვაში.

სასამართლოს გადაწყვეტილებას პოლიტიკური ზეწოლის შედეგად მიიჩნევენ თავისუფალი დემოკრატები და საპროტესტო აქციებს აანონსებენ. ალასანიამ და მისმა თანამებრძოლებმა სახელისუფლებო გუნდი სწორედ კაბელების საქმეზე თავდაცვის სამინისტროს თანამშრომლების დაკავების შემდეგ დატოვეს.