ფედერალური პროკურორების ცნობით, კალიფორნიელი ექიმი, რომელიც მეთიუ პერისთვის კეტამინის მიწოდებაშია ბრალდებული, დანაშაულის აღიარებაზე თანახმაა.

ექიმი სალვადორ პლასენსია თავს დამნაშავედ ცნობს მსახიობისთვის კეტამინის მიწოდების ოთხ ბრალდებაში. აღიარებითი ჩვენება, რომელსაც ექიმი სავარაუდოდ მომდევნო კვირებში მისცემს, ითვალისწინებს მაქსიმუმ 40 წლით თავისუფლების აღკვეთას.

მეთიუ პერი ყველაზე ცნობილია ჩენდლერ ბინგის როლისთვის სერიალ Friends-ში. იგი 2023 წლის ოქტომბერში ლოს ანჯელესში საკუთარი სახლის ჯაკუზიში გარდაცვლილი იპოვეს (დოზის გადაჭარბებით). მანამდე, 54 წლის მსახიობი ღიად საუბრობდა დეპრესიასა და ნარკოტიკებზე დამოკიდებულებასთან ბრძოლის შესახებ, თუმცა, მისი სიკვდილი როგორც ფანებისთვის, ისე მთელი მსოფლიოსთვის შოკი აღმოჩნდა.

ფოტო: CNN

ექიმმა მარკ ჩავეზმა, რომელმაც უკვე აღიარა ამ საქმეში დანაშაული, პროკურორებს ტექსტური შეტყობინებები გაუზიარა, რომლებშიც ექიმი პლასენსია მეთიუ პერის "სულელს" უწოდებს და ინტერესდება, ნარკოტიკებისთვის რა ოდენობის ფულის გადასახდელად იქნება მსახიობი მზად.

საპროცესო შეთანხმებისთვის წარდგენილი დოკუმენტების მიხედვით, ექიმმა პლასენსიამ მეთიუს კეტამინის ინექცია, როგორც საკუთარ სახლში, ისე Long Beach-ის აკვარიუმის პარკინგზე გაუკეთა. მან ნარკოტიკის ინექცია ასწავლა პერის ასისტენტსაც, რომელიც ასევე ბრალდებულია. პლასენსიამ მეთიუსა და მის ასისტენტს ზედმეტი დოზაც მიჰყიდა სახლში შესანახად.

Dr Mark Chavez

Dr Mark Chavez

ფოტო: Damian Dovarganes

Dr Salvador Plasencia

Dr Salvador Plasencia

ფოტო: CNN

ეს ექიმი ერთ-ერთია იმ 5 ადამიანიდან, რომელსაც პროკურატურა ადანაშაულებს დილერებისა და სამედიცინო პერსონალის მიწისქვეშა ქსელში მონაწილეობაში, რომელიც პერის კეტამინით ამარაგებდა. მსახიობი დეპრესიის სამკურნალოდ ნარკოტიკის ლეგალურ, ექიმის მიერ გამოწერილ დოზებს იღებდა, თუმცა გამოწერილზე მეტსაც მოიხმარდა.

საბოლოოდ, როგორც საპროცესო შეთანხმება ამბობს, 2023 წლის 30 სექტემბერსა და 12 ოქტომბერს შორის, ექიმმა პლასენსიამ მეთიუსა და მის ასისტენტს მიჰყიდა კეტამინის ოცი 5 მილილიტრიანი ფლაკონი, თითქმის მთელი შეფუთვა კეტამინის ტაბლეტები და შპრიცები.