ოცნების პარლამენტის დროებითი საგამოძიებო კომისია კოალიცია ცვლილებისთვის ლიდერს ნიკა გვარამიას, რომელიც ამჟამად პატიმრობაშია, მეორედ იბარებს. ინფორმაციას პარტია ახალი სოციალურ ქსელში ავრცელებს.

"ივანიშვილის რეჟიმის ე.წ. პარლამენტმა დღეს რუსთავის მე-12 სასჯელაღსრულების დაწესებულებაში ე.წ. საგამოძიებო კომისიაზე გამოცხადების მოთხოვნით მეორედ მიმართა პოლიტპატიმარ ნიკა გვარამიას.

ჩვენი პოზიცია უცვლელია - არც ერთ ეტაპზე არ ვაპირებთ მივიღოთ რეჟიმის თამაშის წესები, მივანიჭოთ მცირედი ლეგიტიმაცია მაინც და ვითანამშრომლოთ ე.წ. კომისიასთან, რომელიც რეალურად ემსახურება ეროვნული ინტერესების ღალატსა და ისტორიის გადაწერას.

თანმიმდევრულობა, პრინციპულობა, შეურიგებლობა და ართანამშრომლობა, მათ შორის, არმონაწილეობა არჩევნებად წოდებულ ფარსში, არის გზა გამარჯვებისკენ" — წერია განცხადებაში.

ცნობისთვის, ნიკა გვარამია ოთხი დღის წინ დააკავეს. მან ქართული ოცნების დროებითი "საგამოძიებო კომისიაზე" გამოუცხადებლობისთვის დაწესებული 30 000-ლარიანი გირაო არ გადაიხადა. ბრალდებულს სისხლის სამართლის კოდექსის 349-ე მუხლით ედავებოდნენ, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს.