თავისუფალი დემოკრატების ლიდერი ირაკლი ალასანია აცხადებს, რომ ე.წ. კაბელების საქმეზე მოსამართლის მიერ გამოტანილი გამამტყუნებელი განაჩენი ივანიშვილ–კვირიკაშვილის მთავრობის სასამართლო კონტროლის შედეგია.

"დღევანდელი სასამართლო გადაწყვეტილება ჩემთვისაც და დარწმუნებული ვარ, საქართველოს დიდი ნაწილისთვისაც, იყო მოულოდნელი. ასეთ უსამართლობას, ასეთ ნაბიჯს მოსამართლისგან, არავინ არ ველოდით. ივანიშვილი-კვირიკაშვილის მთავრობაში მიდის სასამართლო კონტროლი. სასამართლოს, პროკურატურის კონტროლი მიდის, მაგრამ ასეთ გადაწყვეტილებას თუ აიძულებდნენ მოსამართლეს რომ მიეღო, არ ველოდით.

ირაკლი ალასანიას თქმით, ისინი გააგრძელებენ ბრძოლას სააპელაციო სასამართლოში:

"მე მინდა დავპირდე ივანიშვილს, რომ ეს გადაწყვეტილება იქნება ის გადაწყვეტილება, რომელიც მის ხელისუფლებას ბოლოს მოუღებს, ამაში დარწმუნებული ვარ. მე პირად, ჩემი პარტიისა და საზოგადოების საქმედ ვაქცევ იმას, რომ ეს უდანაშაულო ადამიანები რაც შეიძლება სწრაფად გამოვიდნენ ციხიდან. ეს ერთი და მეორე, დავასრულოთ ეს რეჟიმი, რომელიც იყენებს პროკურატურას პოლიტიკურ ბერკეტად. ეს ხუთი ადამიანი ივანიშვილმა ისევ მძევლად აიყვანა პოლიტიკური ზეწოლისთვის. ვპირდები ამ ადამიანების ოჯახებს, რომ ბოლომდე, სიცოცხლის ფასად დავიხარჯები, რათა ეს ადამიანები გამოვიხსნა ტყვეობიდან და აღვადგინოთ სამართლიანობა".

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ სცნო.