კიევში რუსული სარაკეტო და დრონებით განხორციელებული თავდასხმის შედეგად 14 ადამიანი დაიღუპა. კიევის მერის, ვიტალი კლიჩკოს განცხადებით, დაშავდა 55. დაღუპულთა რაოდენობის შესახებ ინფორმაციას უკრაინული მედია მუნიციპალური სამხედრო ადმინისტრაციის უფროსზე დაყრდნობით ავრცელებს.

"სახლები დანგრეულია, ადამიანური ტკივილი და შფოთვაა. ნანგრევების ქვეშ გადარჩენილების ძებნა მიმდინარეობს. ახლა ერთ-ერთი დარტყმის ადგილზე ვარ. მაშველები, მედიკოსები, პოლიცია, მოხალისეები. ყველა მაქსიმალურად კოორდინირებულად მოქმედებს დაზარალებულების დასახმარებლად და გადასარჩენად", — Ukrinform-ის ცნობით, განაცხადა ადმინისტრაციის უფროსმა ტიმურ ტკაჩენკომ.

BBC წერს, რომ სამშაბათს ღამით განხორციელებული თავდასხმა კიევზე რუსეთის სრულმასშტაბიანი შემოჭრის დაწყებიდან ერთ-ერთი ყველაზე მასშტაბური დაბომბვა იყო.

უკრაინის შინაგან საქმეთა მინისტრმა, იგორ კლიმენკომ განაცხადა, რომ ქვეყნის მიმართულებით სულ 440 დრონი და 32 რაკეტა იქნა გაშვებული.

ამასობაში, მოსკოვის თავდაცვის სამინისტროს ცნობით, რუსეთის საჰაერო თავდაცვის დანაყოფებმა ღამით 147 უკრაინული დრონი გაანადგურეს.

მედიის ცნობით, კიევზე დარტყმები ცხრა საათზე მეტხანს გაგრძელდა — მაცხოვრებლები მზის ამოსვლამდე მიწისქვეშა თავშესაფრებში გაიქცნენ. ოფიციალური პირების თქმით, ბალისტიკური რაკეტა ერთ რაიონში ცხრასართულიან საცხოვრებელ კორპუსს მოხვდა, ქალაქის 27 რაიონი კი ცეცხლის ქვეშ მოექცა.

"ნამდვილ კოშმარში ვიღვიძებ: ნანგრევების ქვეშ მოქცეული ხალხი და სავსე შენობები ჩამოინგრა", — წერს უკრაინის პარლამენტის წევრი ლესია ვასილენკო X-ზე.

უკრაინის პრეზიდენტმა ვოლოდიმირ ზელენსკიმ რუსეთის ბოლო დარტყმების ტალღას "წმინდა ტერორიზმი" უწოდა. მან რუსეთის პრეზიდენტი ვლადიმერ პუტინი დაადანაშაულა მასშტაბური დარტყმების განხორციელებაში.

როგორც მან აღნიშნა, "ტკივილი ტერორისტებმა უნდა იგრძნონ და არა ნორმალურმა, მშვიდობიანმა ადამიანებმა".

შინაგან საქმეთა მინისტრ იგორ კლიმენკოს განცხადებით, დრონებით დარტყმები განხორციელდა ასევე სამხრეთ უკრაინის ქალაქ ოდესაში, რის შედეგადაც ერთი ადამიანი დაიღუპა და სულ მცირე 10 დაშავდა.

BBC-ის ცნობით, ზელენსკი იმედოვნებდა, რომ სამშაბათს კანადაში დიდი შვიდეულის სამიტის ფარგლებში აშშ-ის პრეზიდენტ დონალდ ტრამპთან საუბარი შედგებოდა, მაგრამ ტრამპმა ახლო აღმოსავლეთში კრიზისის ესკალაციის გამო შეწყვიტა ვიზიტი.