"სადამდე დაეშვნენ აშშ-ში "ხალხის წარმომადგენლები"? რომელი ქართული დემოკრატიის მებაირახტრე გიორგი ბაჩიაშვილია, რომ ასე გამოენთნენ და "MEGOBARI აქტის" მიღებას უკავშირებენ," — ასე გამოეხმაურა ქართული ოცნების დეპუტატი, ირაკლი შარმანაშვილი აშშ-ის სენატის საგარეო საქმეთა კომიტეტის წევრის, სენატორი ჯინ შაჰინის განცხადებას.

"ერთი ჩვეულებრივი აგენტია, რომელსაც თავის საქმეს აკეთებინებდნენ და ახლა იცავენ, მაგრამ შენიღბულად მაინც გააკეთონ. ბაჩიაშვილის დონეზე რომ დაეშვება ადამიანი, დემოკრატიის შუქურად წარმოაჩენს და იმის დაცვას დაიწყებს. ადამიანის, რომელიც სხვის მატერიალურ ქონებას, ფინანსებს ითვისებდა და ფულს ათეთრებდა, რაზეც ქართულ მართლმსაჯულებას განაჩენი უკვე დაყენებული აქვს, ეს უკვე ყველაფრის მანიშნებელია," — განაცხადა შარმანაშვილმა.

ცნობისთვის, ჯინ შაჰინმა X-ზე დაწერა, რომ გიორგი ბაჩიაშვილის გატაცება ქართულ დემოკრატიაზე დარტყმაა და ის ის გააგრძელებს მცდელობას, რომ საბოლოოდ მიღებული იქნას "MEGOBARI აქტი".

ჯინ შაჰინი: გავაგრძელებ მცდელობას, რომ პასუხისმგებლობის დაკისრებით მივაღწიო ორპარტიული "MEGOBARI აქტის" მიღებას

შარმანაშვილი ჰელსინკის კომისიის განცხადებასაც გამოეხმაურა და განაცხადა — "რა "დე ფაქტო" ხელისუფლების ტერმინოლოგია აუტყდათ? ქუჩის მომიტინგეები არიან თუ ოფიციალური საკანონმდებლო ხელისუფლების წარმომადგენლები? "

"როდესაც შენი ქვეყნის პრეზიდენტი სხვა ქვეყნის პრეზიდენტს ოფიციალურად ულოცავს დამოუკიდებლობის დღეს, როდესაც ამ ქვეყანასთან ოფიციალური დიპლომატიური ურთიერთობა გაქვს, როდესაც შენი დიპლომატიური წარმომადგენლები ამ ქვეყნის ხელისუფლების წარმომადგენლებს ოფიციალურად ხვდებიან — რა "დე ფაქტო" ხელისუფლების ტერმინოლოგია აუტყდათ? ქუჩის მომიტინგეები არიან თუ ოფიციალური საკანონმდებლო ხელისუფლების წარმომადგენლები? ეს ადამიანები ძალიან დავიწროვდნენ და დაკნინებულად იქცევიან — როგორც ჩანს, ვალდებულებები აქვთ ისეთი, რომ სხვანაირად არ შეუძლიათ," — თქვა შარმანაშვილმა.

ბაჩიაშვილის დაკავებას ჰელსინკის კომისიაც გამოეხმაურა. X-ზე განცხადებაში ჰელსინკის კომისია ქართულ ოცნებას "დე-ფაქტო მთავრობას" უწოდებს და მოუწოდებს ყველა პოლიტპატიმარი გაათავისუფლოს.