შსს-ს გდდ-ს ოპერატიული დაგეგმვის სამმართველოს ყოფილი უფროსის, ირაკლი შაიშმელაშვილის თქმით, ჩორჩანაში საგუშაგოს გახსნაში ჩართული იყვნენ როგორც სამინისტროს სხვადასხვა სტრუქტურული ერთეულები, აგრეთვე სახელმწიფო უსაფრთხოების სამსახურიც. ამის შესახებ მან ტვ პირველის ეთერში საუბრისას განაცხადა.

"როდესაც დაევალა ქვედანაყოფს, რომ ოპერაცია ანუ ღონისძიება განხორციელებულიყო [ჩორჩანაში საგუშაგოს გახსნა], ჩართული იყვნენ როგორც სამინისტროს სხვადასხვა სტრუქტურული ერთეულები, აგრეთვე სახელმწიფო უსაფრთხოების სამსახურიც" — ასე გამოეხმაურა ირაკლი შაიშმელაშვილი ოცნების ხელისუფლების წარმომადგენლებისა განცხადებებს, რომლის მიხედვითაც შს ყოფილმა მინისტრმა გიორგი გახარიამ არ გააფრთხილა მაღალი თანამდებობის პირები ჩორჩანაში საგუშაგოს მშენებლობასთან დაკავშირებით.

TV პირველისთვის მიცემულ ინტერვიუში შაიშმელაშვილი ამბობს, რომ ოკუპირებული რეჟიმისთვის ახლა უმნიშვნელოვანესია, რომ ეს საგუშაგო მოიშალოს.

"როდესაც დაევალა ქვედანაყოფს, რომ ოპერაცია ანუ ღონისძიება განხორციელებულიყო, ჩართული იყვნენ როგორც სამინისტროს სხვადასხვა სტრუქტურული ერთეულები, აგრეთვე სახელმწიფო უსაფრთხოების სამსახურიც. მერე უკვე თავდაცვის სამინისტროს სპეციალური ტექნიკა და ინფრასტრუქტურული კომპონენტებით გვეხმარებოდა. ვიცი რომ ჩართული იყო სოფლისა და მეურნეობის სამინისტროს მელიორაციის სამსახური და ასე შემდეგ. ანუ, ეს იყო ადგილობრივი მუნიციპალიტეტი, ხაშურის მერია, გუბერნია და ყველა მუნიციპალიტეტი მათ შორის არამარტო ხაშურის, ქარელის მუნიციპალიტეტის მერიც საქმის კურსში იყო, რაღაც გარკვეული დახმარებები მათაც აღმოუჩინეს.

დარწმუნებული ვარ, რომ რუსები ახდენენ ზეწოლას, იმიტომ რომ დღემდე სამხრეთ ოსეთისთვის ჩორჩანას საგუშაგო არის ძალიან დიდი პრობლემა და გამოწვევა. ანუ, მათი მთავრობა შიდა დისკუსიებში და საუბრებში ყოველთვის ამ თემით მანიპულირებს და დღის წესრიგში უდგათ, რომ ამ საგუშაგოს საქართველოს მთავრობას ააღებინებენ. მეორე ეს არის გახარიას პირადი შურისძიება, ის რომ გახარია დაიჭირონ. ანუ, თემა წამოწიეს ისეთი, რომ ძალიან სენსიტიურია და პირდაპირ ურტყამს სახელმწიფო ინტერესებს.

უნიჭოდ დადგმული ხელოვნური სპექტაკლია, მაგრამ ეს სპექტაკლი ძალიან სახიფათო ფაზაში შეჰყავთ ვინაიდან ეროვნული ინტერესებით მანიპულირებას ახდენენ," — განაცხადა ირაკლი შაიშმელაშვილმა TV პირველთან ინტერვიუში.

ცნობისთვის, პროკურატურის მიერ გავრცელებულ განცხადებაში ნათქვამია, რომ დაწყებული გამოძიება "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

უწყების ცნობით, გამოძიება სისხლის სამართლის კოდექსით, "საბოტაჟის, უცხოეთის ორგანიზაციისათვის და უცხოეთის კონტროლს დაქვემდებარებული ორგანიზაციისათვის მტრულ საქმიანობაში დახმარების და საქართველოს კონსტიტუციური წყობილების და ეროვნული უშიშროების საფუძვლების წინააღმდეგ მიმართული საქმიანობისთვის ფინანსების მობილიზების ფაქტზე" მიმდინარეობს.

სოფელ ჩორჩანაში, ოკუპაციის ხაზთან ახლოს, პოლიციის საგუშაგო, გიორგი გახარიას შს მინისტრობის დროს, 2019 წლის აგვისტოში აშენდა. მანამდე, 5 თვის განმავლობაში, გაჰყავდათ საგუშაგომდე მიმავალი გზა, რომელიც ჩორჩანის ტყეზე გადის.

მიმდინარე წლის 14 აპრილს ოცნების პარლამენტის საგამოძიებო კომისიაზე დაბარებულ გიორგი გახარიას ამ საკითხზეც დაუსვეს კითხვები. წულუკიანის კომისიაში აცხადებდნენ, რომ გახარიამ თვითნებურად ააშენა საგუშაგო, რამაც ადგილზე ვითარების დაძაბვა გამოიწვია. გახარიას თქმით, "ყველამ ყველაფერი იცოდა".

ასევე იხილეთ: